ިކްރޮއޭޓާ ހަބް އިމާރާތުގެ ފިނިޝިންގެ މަސައްކަތް ފަށައިފި

މާލޭގައި ތަރައްގީކުރަމުންދާ "ކްރިއޭޓާ ހަބް" ގެ މައި އިމާރާތުގެ އޮނިގަނޑުގެ މަސައްކަތްތައް އެއްކޮށް ނިމި، މިހާރު ކުރިއަށްދަނީ އެތެރޭގެ ފިނިޝިންގ މަސައްކަތްތައް ކަމަށް ބިޒްނަސް ސެންޓާ ކޯޕަރޭޝަން (ބީސީސީ) އިން ބުނެފިއެވެ.

ބީސީސީން މައުލޫމާތު ދިން ގޮތުގައި އިމާރާތުގެ ސްޓްރަކްޗަރަލް މަސައްކަތްތަކުގެ 100 އިންސައްތަ ވަނީ ނިމިފައެވެ. އަދި މިހާރު ކުރިއަށްދާ މަސައްކަތްތަކުގެ ތެރެއިން އެތެރޭގެ ރޭނުމުގެ 97 އިންސައްތަ ނިމިފައިވާއިރު، ފެން ވައިރުކުރުމުގެ 75 އިންސައްތަ އަދި ކަރަންޓު މަސައްކަތާއި ކުލަލުމުގެ މަސައްކަތުގެ 5 އިންސައްތަ ވަނީ ނިމިފައެވެ.

11 ބުރިއަށް ތަރައްގީކުރާ މި އިމާރާތަކީ ރާއްޖޭގެ އުފެއްދުންތެރި އިގްތިސޯދު ފުޅާކުރުމަށްޓަކައި ބީސީސީން އިސްނަގައިގެން ކުރިއަށްގެންދާ ވަރަށް މުހިންމު މަޝްރޫއެކެވެ.

ބީސީސީގެ މެނޭޖިންގ ޑިރެކްޓަރު އިބްރާހިމް ޒިޔާއު މުހައްމަދު ވިދާޅުވީ، އެ ކުންފުނީގެ މައިގަނޑު އަމާޒަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވަރާ އެއްގޮތަށް، ކްރިއޭޓާ ހަބް ރަސްމީކޮށް ހުޅުވާއިރު އުފެއްދުންތެރިންނަށް ބޭނުންވާ ހުރިހާ ޚިދުމަތެއް އެއްފުރާޅެއްގެ ދަށުން ފުރިހަމައަށް ލިބޭނެ ފެސިލިޓީއަކަށް އެތަން ހެދުން ކަމަށެވެ.

ކްރިއޭޓަރ ހަބް ހުޅުވުމުން އާޓިސްޓުންނާއި، ޑިޒައިނަރުންނާއި، ޕްރޮގްރާމަރުންގެ އިތުރުން ކޮންޓެންޓް އުފައްދާ ފަރާތްތަކަށް ބޭނުންވާ ޒަމާނީ ޕްރޮޑަކްޝަން ސްޓޫޑިއޯތަކާއި ކޯ-ވާކިންގ ސްޕޭސްތައް ލިބިގެންދާނެއެވެ. މީގެ ތެރޭގައި ފޮޓޯގްރަފީ، ވީޑިއޯ، އޯޑިއޯ ރެކޯޑިންގ އަދި އެޑިޓިންގއަށް ޚާއްސަ ތަންތަނާއި އެންމެ ފަހުގެ ޓެކްނޮލޮޖީގެ ސާމާނު ހިމެނޭނެއެވެ.

މީގެ އިތުރުން، ބީސީސީން ކުދި އަދި މެދުފަންތީގެ ވިޔަފާރިތަކަށް ދޭ މުހިންމު ކޮންސަލްޓެންސީ އާއި އެޑްވައިޒަރީ ޚިދުމަތްތައް މި އިމާރާތަށް ބަދަލުކުރެވި، ދިވެހި އުފެއްދުންތައް އިޝްތިހާރުކޮށް ވިއްކުމަށް ޚާއްސަ "އޮތެންޓިކް މޯލްޑިވްސް" ގެ އައުޓްލެޓެއް ވެސް ގާއިމުކުރެވޭނެއެވެ. ޤައުމީ އިޤްތިޞާދު ސިންދަފާތުކޮށް، ޑިޖިޓަލް އަދި އުފެއްދުންތެރި ދާއިރާތަކުން ޒުވާނުންނަށް އައު ފުރުޞަތުތަކެއް ހުޅުވައިދޭނެ މި މުހިންމު ހަބް ރަސްމީކޮށް ހުޅުވުމަށް ހަމަޖެހިފައިވަނީ 11 ނޮވެމްބަރު 2026 ގައެވެ.