-
ޔޫރަޕިއަން ޔޫނިއަން (އީޔޫ) އާއި ބެލްޖިއަމަށް ދިވެހިރާއްޖޭން ކަނޑައަޅާފައި ހުންނަވާ ޚާއްސަ ސަފީރުކަމުގެ މަޤާމަށް ކުރީގެ ބަންޑާރަނައިބު ފާޠިމަތު ދިޔާނާ ސަޢީދު އައްޔަންކުރެއްވުމަށް ރައީސް ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވައިފިއެވެ.
ދިޔާނާ އެ މަޤާމަށް އައްޔަންކުރުމާމެދު ރައީސް ފޮނުއްވާފައިވާ ރަސްމީ ސިޓީފުޅު މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި ވަނީ އިއްވާފައެވެ.
ރައީސް މުޢިއްޒުގެ ސިޓީފުޅު މަޖިލީހަށް އިއްވުމަށްފަހު، އެކަމާމެދު ދިރާސާކޮށް ގޮތެއް ނިންމުމަށްޓަކައި މަޖިލީހުގެ ޚާރިޖީ ގުޅުންތަކުގެ ކޮމިޓީއަށް މިއަދު ވަނީ ރަސްމީކޮށް ފޮނުވާފައެވެ.
ކޮމިޓީ މަރުހަލާގައި ދިޔާނާގެ ނަންފުޅު ދިރާސާކުރުމަށްފަހު، ސަފީރުކަމުގެ މަގާމަށް އޭނާ ޝަރުތުހަމަވޭތޯ ބަލައި މަޖިލީހުގެ ތަޅުމަށް ރިޕޯޓު ހުށަހަޅާނެއެވެ.
ސަފީރުކަމަށް އައްޔަންކުރެވޭނީ ކޮމިޓީ ރިޕޯޓަށް މަޖިލީހުގެ ތަޅުމުގައި ވޯޓަށް އަހައި، މެންބަރުންގެ އަޣުލަބިއްޔަތު ލިބުމުންނެވެ.
ދިވެހިރާއްޖޭގެ ސިޔާސީ އަދި ގާނޫނީ ދާއިރާގައި ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ ފާޠިމަތު ދިޔާނާ ސަޢީދަކީ މީގެ ކުރިން ދައުލަތުގެ ބޮޑެތި މުހިންމު މަގާމުތަކެއް ފުރުއްވާފައިވާ ބޭފުޅެކެވެ. އެގޮތުން، ކުރީގެ ރައީސް މުޙައްމަދު ނަޝީދުގެ ވެރިކަމުގައި ރާއްޖޭގެ ބަންޑާރަނައިބު ކަމުގެ މަޤާމު އޭނާ ވަނީ ފުރުއްވާފައެވެ. އޭގެ ފަހުން ކުރީގެ ރައީސް ޑރ. މުޙައްމަދު ވަޙީދުގެ ވެރިކަމުގެ ދުވަސްވަރު ޖެންޑަރ މިނިސްޓަރުކަމުގެ މަޤާމު ވެސް ދިޔާނާ ވަނީ އަދާކުރައްވާފައެވެ.
ފޮރިން ސަރވިސްގެ މި މުހިންމު މަޤާމަށް ދިޔާނާ އައްޔަންކުރެއްވުމަށް މަޖިލީހަށް ފޮނުއްވުމުގެ ކުރިން، ސަރުކާރުގެ ޚާރިޖީ ސިޔާސަތުތައް ހަރުދަނާކުރުމުގެ ގޮތުން "އެމްބެސެޑަރ އެޓް ލާޖް" ގެ މަތީ މަގާމަށް ރައީސް މުޢިއްޒު އޭނާ އައްޔަންކުރެއްވީ މިދިޔަ އޭޕްރިލް މަހުގެ ތެރޭގައެވެ.
ދިޔާނާއަކީ ސާކްގެ ސެކްރެޓަރީ ޖެނެރަލްކަން ވެސް ފުރުއްވާފައިވާ، ބައިނަލްއަގުވާމީ ގުޅުންތަކުގެ ދާއިރާގެ ބޮޑު ތަޖުރިބާއެއް ލިބިވަޑައިގެންފައިވާ ގާނޫނީ މާހިރެކެވެ.
އީޔޫއަކީ ރާއްޖޭގެ ވިޔަފާރިއާއި ފަތުރުވެރިކަމުގެ ބޮޑު ބައިވެރިއަކަށް ވުމާއެކު، މި މަގާމަށް ދިޔާނާ އައްޔަންކުރުމުން ދެމެދުގައި އޮތް ޚާރިޖީ ގުޅުންތައް އިތުރަށް ބަދަހިވެގެންދާނެ ކަމަށް ބެލެވެއެވެ.
ފަހުގެ
