ކޭޓްގެ ލޯބި މެސެޖަކާއި އެކު ވިލިއަމްއަށް ބައްޕަމެންގެ ދުވަހާއި އުފަންދުވަހުގެ ތަހުނިޔާ!

އިނގިރޭސި ޕްރިންސެސް ކޭޓް މިޑްލްޓަން، އޭނާގެ ފިރިމީހާ ޕްރިންސް ވިލިއަމްއަށް ޚާއްސަ މެސެޖަކާއެކު ބައްޕަމެންގެ ދުވަހުގެ ތަހުނިޔާ ފޮނުވައިފިއެވެ. މިފަހަރުގެ ބައްޕަމެންގެ ދުވަސް ދިމާވީ ޕްރިންސް ވިލިއަމްގެ 44 ވަނަ އުފަންދުވަހާ ވެސް އެއް ދުވަހަކަށެވެ.

ޖޫން 21 ވީ އާދިއްތަ ދުވަހު، މި ދެމަފިރިންގެ ރަސްމީ އިންސްޓަގްރާމް އެކައުންޓް މެދުވެރިކޮށް ކޭޓް ވަނީ ވިލިއަމް އާއި އެމީހުންގެ އަންހެން ދަރިފުޅު ޕްރިންސަސް ޝާލޮޓް އެކުގައި ތިބި މީގެ ކުރިން ނުފެންނަ ރީތި ފޮޓޯއެއް ހިއްސާކޮށްފައެވެ.

ފޮޓޯގެ ކެޕްޝަންގައި ކޭޓް ލިޔެފައިވެއެވެ. "ދުނިޔޭގައި ހުރި އެންމެ ރަނގަޅު ބައްޕައަށް، އުފަންދުވަހުގެ އަދި ބައްޕަމެންގެ ދުވަހުގެ ތަހުނިޔާ. އަހަރެމެން ވަރަށް ލޯބިވޭ. ސީ، ޖީ، ސީ އެންޑް އެލް." (މިއީ ކޭޓް، ޖޯޖް، ޝާލޮޓް އަދި ލޫއީގެ ނަމުގެ ކުރީ އަކުރެވެ).

މި ލޯބި ފޮޓޯއަކީ ޖޫން 13 ވަނަ ދުވަހު ބޭއްވުނު ޝާހީ އަހަރީ ހަފުލާ "ޓްރޫޕިންގް ދަ ކަލާ" ގެ ތެރެއިން ނަގާފައިވާ ފޮޓޯއެކެވެ. ފޮޓޯއިން ފެންނަނީ ޕްރިންސް ވިލިއަމް އޭނާގެ 11 އަހަރުގެ އަންހެން ދަރިފުޅު ޝާލޮޓްގެ ކޮނޑުގައި އަތް ބާއްވާލައިގެން ހިނިތުންވެފައި ހުންނަ މަންޒަރެވެ.

ވިލިއަމް ހުރީ އޭނާގެ އަސްކަރީ މަތީ މަގާމު ރަމްޒުކޮށްދޭ ވެލްޝް ގާޑްސްގެ ރަސްމީ ޝާހީ ހެދުމުގައެވެ. އަދި ޝާލޮޓް ހުރީ ހުދުކުލައިގެ ހެދުމެއްގައެވެ.

ވިލިއަމްގެ ބައްޕަ، ކިންގް ޗާލްސް ތިންވަނަ ވެސް ވަނީ އިންސްޓަގްރާމް މެދުވެރިކޮށް، "ވޭލްސްގެ ޕްރިންސްއަށް އުފަންދުވަހުގެ ތަހުނިޔާ" ފޮނުއްވާފައެވެ.