އަޒަރުބައިޖާނަށް ހަމަލާއެއް އަމާޒުވެއްޖެ، އިރާނުން ބުނަނީ ހަމަލާ ނުދޭކަމަށް!

މެދުއިރުމަތީގައި މިހާރު ހިނގަމުންދާ ހަނގުރާމާގައި ފުރަތަމަ ފަހަރަށް އަޒަރުބައިޖާނަށް ހަމަލާއެއް އަމާޒުވެއްޖެ އެވެ.

އަޒަރުބައިޖާނުގެ ސަރުކާރުން ވަނީ އީރާނުން އެގައުމުގެ ސަރަހައްދަށް ޑްރޯން ހަމަލާތަކެއް ދީ ދެ މީހަކު ޒަޚަމްކޮށްލާފައި ކަމަށް ތުހުމަތުކޮށްފައެވެ.

އެގޮތުން އީރާނުގެ އުތުރުން ބޯޑަރު އޮންނަ އަޒަރުބައިޖާނުގެ އެކްސްކްލޭވް ނަކްޗިވާންގައި މިއަދު ހެނދުނު ބައިނަލްއަގްވާމީ އެއާޕޯޓެއްގެ ޓާމިނަލް އިމާރާތަށް ޑްރޯނެއް ވެއްޓިފައިވާ ކަމަށް އަޒަރުބައިޖާނުގެ ފޮރިން މިނިސްޓްރީން ވަނީ ބުނެފައި އެވެ.

މި އެއާޕޯޓަކީ އީރާނުގެ ބޯޑަރާއި ގާތްގަނޑަކަށް 10 ކިލޯމީޓަރު (ހަ މޭލު) ދުރުގައި އޮންނަ އެއާޕޯޓެކެވެ.

މި ހަމަލާގެ އިތުރުން އިތުރު ޑްރޯންއެއް ކައިރީގައި އޮންނަ އެހެން އަވަށެއްގެ ސްކޫލެއް ކައިރިއަށް ވެއްޓުނު ކަމަށްވެސް ރިޕޯޓުތައް ބުނެއެވެ.

އެއާޕޯޓް އިމާރާތެއް ހިމެނޭ ގޮތަށް އަޒަރުބައިޖާނުގެ އޮޓޮނޮމިކް ނަކްޗިވާން އެކްސްކްލޭވް އަށް އީރާނުގެ ދެ ޑްރޯނުން ދިން ކަމަށް ބުނާ ހަމަލާއަކީ އިރާނުން ދިން ހަމަލާއެއް ކަމަށް ބުނަމުންދާ ވާހަތަކަށް އިރާނުގެ ފޮރިން މިނިސްޓަރުގެ ނައިބު ކާޒެމް ޣަރީބާބާދީ ވަނީ ދޮގުކޮށްފަ އެވެ.

އެގޮތުން އޭނާ ވިދާޅުވީ "އިރާނުގެ ސިޔާސަތަކީ އެމެރިކާ އާއި އިސްރާއީލު ހިމެނޭ ގޮތަށް އީރާނަށް ހަމަލާދިނުމަށް ބޭނުންކުރާ ދުޝްމަނުންގެ އަސްކަރީ މަރުކަޒުތަކަށް ހަމަލާދިނުން" ކަމަށެވެ.