މިއަހަރު 113،382 ގޭބީސީއަކަށް މަސްދަޅުކޭސް ދޫކޮށްފި

މި ރޯދަމަހުގެ ރައްޔިތުންނަށް ރޯދަ ހަދިޔާ ގޮތުގައި ސަރުކާރުން ދިން މަސްދަޅުކޭހުގެ 113،382 މަސްދަޅުކޭސް ދޫކޮށްފި އެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ސިޓީތަކާއި އިދާރީ ދާއިރާތައް ހިންގުމާ އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވީ މިދިޔަ އަހަރަށްވުރެ މި އަހަރު ރޯދަ ހަދިޔާ ދޫކުރި އަތޮޅުތަކުގެ ގޭބީސީގެ އަދަދު މަދުވި ނަމަވެސް މާލެ ސަރަހައްދުގައި ރޯދަ ހަދިޔާ ދޫކުރި ގޭބީސީތަކުގެ އަދަދު އިތުރުވެފައިވާ ކަމަށެވެ.

މިނިސްޓަރު ވިދާޅުވީ މިދިޔަ ޖެނުއަރީ މަހުގެ 24 ވަނަ ދުވަހުން ފެށިގެން މާލެ ސަރަހައްދުގައި ރޯދަ ހަދިޔާ ބެހުމުގެ މަސައްކަތް ފަށާފައިވާއިރު ބުދަ ދުވަހުގެ ރެއާ ހަމައަށް ހުރިހާ ގޭބީސީއަކުން ރޯދަ ހަދިޔާ ނަގާފައިވާ ކަމަށެވެ.

މިދިޔަ އަހަރެކޭ އެއްގޮތައް މިއަހަރުވެސް މާލެ ސަރަހައްދުގައި 55،667 ގޭބީސީއަކަށް މަސްދަޅު ކޭސް ދޫކޮށްފައިވާކަން މިނިސްޓަރު ފާހަގަކުރި އެވެ. އަދި މިއަހަރު އަތޮޅުތަކުގެ ގޭބީސީތަކަށް ބެހުމަށް 57،715 މަސްދަޅުކޭސް ފޮނުވާފައިވާކަމަށް މިނިސްޓަރު ފާހަގަކުރި އެވެ.

މީގެއިތުރުން މިނިސްޓަރު ވަނީ މުޅި ރާއްޖޭއަށް ޖުމްލަ 113،382 ގޭބީސީއަކަށް މަސްދަޅުކޭސް ދޫކޮށްފައިވާކަން ފާހަގަކޮށްފަ އެވެ.

މި ހުރިހާ ގޭބީސީތަކަށް މަސްދަޅު ދޫކޮށްފައިވާ ގޮތް ހާމަކުރަމުން މިނިސްޓަރު ވިދާޅުވީ މާލެ ސަރަހައްދުގައި ގޭބިސީތައް ބަލާފައިވަނީ ސްޓެލްކޯގައި ރަޖިސްޓްރީކޮށްފައިވާ ޑޮމެސްޓިކް މީޓަރުތަކަށް ކަމަށެވެ. އަދި އަތޮޅުތަކުގައި ކައުންސިލްތަކުން ފޯރުކޮށްދީފައިވާ އެންމެ ފަހުގެ ރަޖިސްޓްރީތަކަށް ބަލާފައިވާ ކަމަށާއި ގޭބިސީތަކަށް މަސްދަޅު ކޭސް ބެހުމުގައި ލިސްޓުތަކުގެ ސައްޚަކަން ކަށަވަރުކޮށްފައިވާނެ ކަމަށްވެސް މިނިސްޓަރު ވިދާޅުވި އެވެ.