ފުވައްމުލައް ސިޓީގެ އެންމެ ފަހުގެ މަޢުލޫމާތު ހިމެނޭ ޑިޖިޓަލް ޗާޓް އިފްތިތާޙްކޮށްފި

ފުވައްމުލައް ސިޓީގެ އެންމެ ފަހުގެ ސެޓަލައިޓް މަންޒަރާއި ގޯތިގެދޮރާއި ވިޔަފާރިތަކުގެ މަޢުލޫމާތު ހިމެނޭހެން ތައްޔާރުކޮށްފައިވާ ޚާއްޞަ ޑިޖިޓަލް ޗާޓް އިފްތިތާޙްކޮށްފިއެވެ.

މިދިޔަ ބުދަ ދުވަހު އިފްތިތާހު ކުރި މި ޗާޓުން ރަށުގެ އެންމެ ފަހުގެ ހައި ރިޒޮލިއުޝަން 'ސެޓަލައިޓް ވިއު' ފެންނާނެ ކަމަށް ފުވައްމުލައް ސިޓީ ކައުންސިލުން ބުނެއެވެ. އަދި ހައި ރިޒޮލިއުޝަން މި ޗާޓުން ޕްލޭނިން އަދި ކުދި ސާވޭތަކަށް ބޭނުންވާ ސެޓެލައިޓް އިމޭޖް ލިބިގެންދާނެ ކަމަށާއި މީގެ އިތުރުން ރަށުގެ ގޭގެއާއި އެހެނިހެން ތަންތަނުގެ ލޮކޭޝަނާއި އެތަންތަނަށް ދާނެ ފަސޭހަ މަގު ދައްކައިދޭނެ ކަމަށްވެސް ސިޓީ ކައުންސިލުން ބުނެއެވެ.

ޑިޖިޓަލް މި ޗާޓުގެ ސަބަބުން ވިޔަފާރިތަކަށް ބޮޑެތި ފަސޭހަތަކެއް ލިބިގެންދާނެކަން ފާހަގަކޮށް ކައުންސިލުން ބުނީ ޚާއްޞަކޮށް ޑެލިވަރީގެ ޚިދުމަތް ދޭ ވިޔަފާރިތަކަށް ކަސްޓަމަރުންގެ ލޮކޭޝަން ދެނެގަތުމަށާއި، އަވަސް ޚިދުމަތް ފޯރުކޮށްދިނުމަށް މި ޗާޓުގެ ސަބަބުން ފަސޭހަވެގެންދާނެ ކަމަށެވެ.

ފުވައްމުލަކަކީ ގިނަ އަދަދެއްގެ ފަތުރުވެރިން ޒިޔާރަތްކުރާ ރަށަކަށްވާއިރު،ޑިޖިޓަލް މި ޗާޓުގެ އެހީގައި ރަށަށް ޒިޔާރަތްކުރާ ފަރާތްތަކަށް ރަށުގެ އެކި ތަންތަން ފަސޭހައިން ދެނެގަނެ، ރަށުގެ ރީތިކަން ބަލާލުމުގެ ފުރުޞަތު އިތުރަށް ފަސޭހަ ވެގެންދާނެއެވެ. މި ޗާޓް ފަރުމާކޮށްފައިވާ ވަނީ އިނގިރޭސި ބަހާއި ދިވެހި ބަހުން ބަލާލެވޭގޮތަށެވެ. މިއީ ކައުންސިލް އިދާރާގެ މުއައްޒަފުން ތައްޔާރުކޮށްފައިވާ ޗާޓެކެވެ.

ފުވައްމުލައް ސިޓީ މެޕް: