ގިރާވަރު ފަޅު ހިއްކުމުގެ މަސައްކަތް ފަށައިފި

މާލެ ސަރަހައްދުން ބޯހިޔާވަހިކަމަށް ތަރައްޤީކުރަމުން އަންނަ ސަރަހައްދުތަކުގެ ތެރޭގައި ހިމެނޭ ގިރާވަރު ފަޅު ހިއްކުމުގެ މަސައްކަތް ފަށައިފިއެވެ.

މި މަސައްކަތް ފައްޓަވާފައިވާކަން ހަމަކުރެއްވީ ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. އެގޮތުން ރައީސް ވިދާޅުވީ ގިރާވަރު ފަޅު ހިއްކުމުގެ މަސައްކަތް މިއަދު ހެނދުނު ފަށާފައިވާކަމަށެވެ.ގިރާވަރު ފަޅު ހިއްކުމުގެ މަސައްކަތް ކުރަމުންދަނީ ބިން ހިއްކުމުގެ މަސައްކަތަށް ރާއްޖެއަށް ގެންސްފައިވާ ބޮޑެތި ޑްރެޖަރުތަކުގެ ތެރެއިން ޓްރެއިލިން ސަކްޝަން ހޮޕަރ ޑްރެޖަރ އޮރަންޖީއާއެވެ. މިއީ އެއްފަހަރާ 22,000 ކިއުބިކް މީޓަރުގެ ވެލި ނެގުމުގެ ޤާބިލުކަން ލިބިފައިވާ ބޮޑު ޑްރެޖަރެކެވެ.

ގިރާވަރު ފަޅު ހިއްކުމުގެ މަސައްކަތް ފެށުމުގެ ކުރީން އެޑްރެޖަރުން ވަނީ ހުޅުމާލެ ފޭސް 3 ހިއްކުމުގެ މަސައްކަތް ވަރަށް ހަލުވި ސްޕީޑެއްގައި ނިންމާލާފައި އެވެ.

ގިރާވަރު ހިއްކުމުގެ މަޝްރޫއަކީ މާލޭ ސަރަހައްދުގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ކުރިއަށްގެންދާ މަޝްރޫއެކެވެ. ކުރީ ސަރުކާރުގައި ގިރާވަރުފަޅު ހިއްކުންވެސް ނުަފަށަނީސް ވަނީ އެފަޅުން މާލޭގެ ރައްޔިތުންނަށް ގޯތި ދީފައި އެވެ.

ގިރާވަރު ފަޅުން ޖުމުލަ 169 ހެކްޓަރުގެ ބިން ހިއްކުމަށް ހަމަޖެހިފައިވާއިރު މީގެ ކުރީން އެފަޅުން ވަނީ 56 ހެކްޓަރުގެ ބިން ހިއްކާފައި އެވެ. އެހެންކަމުން ގިރާވަރު ފަޅުން އިތުރަށް 113 ހެކްޓަރުގެ ބިން ހިއްކަން ޖެހޭނެއެވެ.