ދެގުނަ ކެޕޭސިޓީގެ ޑްރެޖަރަކާއެކު ރަސްމާލޭގައި އިތުރު 265 ހެކްޓަރުގެ ބިން ހިއްކަން ފަށައިފި

ރަސްމާލޭގައި އިތުރު 265 ހެކްޓަރުގެ ބިން ހިއްކުމުގެ މަސައްކަތް ފަށައިފިއެވެ.

މިހާތަނަށް ރާއްޖޭގައި ކުރިޔަށްގެންދާ އެންމެ ބޮޑު އެއް ބިން ހިއްކުމުގެ މަޝްރޫއުތަކުގެ ތެރޭގައި ހިމެނޭ މި މަޝްރޫއުގެ ދަށުން ރޭ ހިއްކަން ފަށާފައިވަނީ ރަސްމާލޭގެ ސީ އަދި އީ ސައިޓެވެ. މިއީ ޖުމުލަ 265 ހެކްޓަރުގެ ސަރަހައްދެކެވެ.

ރޭ ބިން ހިއްކުމުގެ މަަސައްކަތް ފެށީ ޗައިނާ ހާބަރ އިންޖިނިއަރިންގ ކޮމްޕެނީ ޕްރައިވެޓް ލިމިޓެޑުންނެވެ. އެގޮތުން މި މަސައްކަތް އެކުންފުންޏާއި ހަވާލުކުރީ މިމަހުގެ ކުރީކޮޅު އެވެ.

ރޭ ފެށުނު މަސައްކަތާއި އެކު ސައިޓް "ސީ"ގައި ހިމެނޭ 190 ހެކްޓަރާއި "އީ"ގައި ހިމެނޭ 75 ހެކްޓަރުގެ ބިން ހިއްކާނެއެވެ. އެގޮތުން ބިންހިއްކުމަށް ފަށާފައިވަނީ ޓްރެއިލަރ ސަކްޝަން ހޮޕަރ ޑްރެޖަރެއް ކަމުގައިވާ "ޔެންގ ޖުން 1" އެވެ. މި ޑްރެޖަރުގެ ކެޕޭސިޓީއަކީ 21،000 ކިޔުބިކް މީޓަރެވެ. މިއީ ރަސްމާލެ ހިއްކުމަށް މިހާތަނަށް ބޭނުންކުރަމުން އައި ޑްރެޖަރަށް ވުރެ ދެގުނަ ބޮޑު ޑްރެޖަރެއެވެ.

ބޯހިޔާވަހިކަމުގެ މައްސަލައަށް ހައްލު ހޯދައިދިނުމުގެ ގޮތުން އަދުގެ ސަރުކާރުން ކުރިއަށްގެންދާ އެންމެ ބިޔަ ބޮޑު މަޝްރޫޢުއަކީ ރަސްމާލެ ތަރައްޤީކުރުމުގެ މަޝްރޫޢުއެވެ. މި މަޝްރޫޢުގެ ދަށުން މިހާތަނަށް 129.60 ހެކްޓަރުގެ ބިން ހިއްކާ ނިންމާފައެވެ. މި ސަރަހައްދުތަކުން 21،641 މުރަކަ ރައްކާތެރިކަމާއެކު ނެގުމަށްފަހު ވަނީ މާލެ އަތޮޅު ބެންހާފަރާއި މަނިޔަފުށ،ި އަދި ބައެއް ރިސޯޓުތަކުގެ މުރަކަ އާލާކުރުމުގެ ޕްރޮގްރާމްތަކަށް ބަދަލުކޮށްފައެވެ.

ރަސްމާލެއިން ހިއްކުމަށް ހަމަޖެހިފައިވާ އިތުރު ސަރަޙައްދުތަކަށް ބަލާއިރު ސައިޓް "ޖޭ"ގެ 29 ހެކްޓަރުގެ ބިން ހިއްކާ ނިންމުމަށްފަހު ގޮނޑުދޮށް ހިމާޔަތް ކުރުމުގެ މަސައްކަތް ފެށުމަށް ވަނީ ތައްޔާރުވެފައެވެ. އަދި ސައިޓް "ޑީ، އެފް، ޖީ، އެލް" އިން 394 ހެކްޓަރުގެ ބިން ހިއްކާއިރު މިހާތަނަށް އައިއިރު ވަނީ 100.60 ހެކްޓަރުގެ ބިން ހިއްކާ ނިންމާފައެވެ. މީގެ އިތުރުން ސައިޓް "އޭ، ބީ، އެޗް،އައި" މި ސަރަޙައްދުތަކުން 321 ހެކްޓަރުގެ ބިން ހިއްކުމަށް ހަމަޖެހިފައިވެއެވެ. މި ސަރަހައްދުން ބިން ހިއްކުމަށް ހަމަޖެހިފައިވާއިރު މި ސަރަހައްދުގައި ހުރި މުރަކަތައް ރައްކާތެރިކަމާއެކު އެހެން ސަރަހައްދުތަކަށް ބަދަލުކުރުމުގެ މަސައްކަތް މިހާރު ވަނީ ނިންމާލާފައިއެވެ.