ދޮންފަނުގައި ސަރުކާރުން ހިންގާ އުމްރާނީ ތަރައްޤީގެ މަޝްރޫއުތަކެއް އެމްޓީސީސީއާއި އެފްޑީސީއަށް!

ބ ދޮންފަނުގައި ސަރުކާރުން ހިންގަން ނިންމާފައިވާ މަޝްރޫއުތަކެއް ކޮންޓްރެކްޓަރުންނާއި ހަވާލުކޮށްފި އެވެ.

ސަރުކާރުން މިއަދު ކޮންޓްރެކްޓަރުންނާއި ހަވާލުކުރީ ދޮންފަނު ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުއާއި ދޮންފަނު ސްކޫލު ތަރައްޤީކުރުމުގެ މަޝްރޫޢު އެވެ.

މި ދެ މަޝްރޫއުވެސް ކޮންޓްރެކްޓަރުންނާއި ހަވާލުކުރުމުގެ ރަސްމިއްޔާތު ކުރިޔަށް ގެންގޮސްފައިވަނީ މިހާރު ރައީސް ޑރ މުހައްމަދު މުއިއްޒު ބ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު ދޮންފަނަށް ވަޑައިގެން އެރަށުގެ ރައްޔިތުންނާއި ބައްދަލުކުރެއްވުމަށް ކުރިޔަށް ގެންދިޔަ ޖަލްސާގެ ތެރެއިންނެވެ.

އެގޮތުން ބިން ހިއްކުމާއި ގޮނޑުދޮށް ހިމާޔާތްކުރުމުގެ މަޝްރޫއު ސަރުކާރުން ހަވާލުކުރީ އެމްޓީސީސީއާއިއެވެ. މި އެއްބަސްވުމުގައި، އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. ޢަބްދުﷲ މުއްޠަލިބެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު ސައުދީއެވެ. މި މަޝްރޫޢުގެ ދަށުން 13 ހެކްޓަރުގެ ސަރަޙައްދެއް ހިއްކުމާއެކު، ހިއްކާ ބިމުގެ ވަށައިގެން 1,229 މީޓަރުގެ ރިވެޓްމަންޓަކާއި 125 މީޓަރުގެ ބްރޭކްވޯޓަރއެއް ޤާއިމުކުރުމަށް ވަނީ ހަމަޖެހިފައެވެ. މީގެއިތުރުން، ގޮނޑުދޮށް ހިމާޔަތްކުރުމުގެ ގޮތުން 25 މީޓަރުގެ ދެ ފައިކަށްޓަކާއި 15 މީޓަރުގެ އެއް ފައިކަށިލުމާއެކު، ބަނދަރުގައި 42 މީޓަރުގެ ޖެޓީއެއް ތަރައްޤީކުރުމަށްވެސް ވަނީ ހަމަޖެހިފައެވެ. މި މަސައްކަތް ކުރުމަށް އެމްޓީސީސީއާ ހަވާލުކޮށްފައިވަނީ 214 މިލިޔަން ރުފިޔާއަށް 720 ދުވަސްތެރޭ ނިންމާގޮތަށެވެ.

ދޮންފަނު ސްކޫލު ތަރައްޤީކުރުމުގެ މަޝްރޫޢު ސަރުކާރުން ހަވާލުކުރީ ފަހި ދިރިއުޅުން ކޯޕަރޭޝަންއާއި އެވެ. އެގޮތުން އެކަމާއި ގުޅޭ އެއްބަސްވުމުގައި ތަޢުލީމީ ވުޒާރާގެ ފަރާތުން ސޮއިކުރެއްވީ ވަޒީރު ޑރ. އިސްމާޢީލް ޝަފީޢުއެވެ. އަދި ފަހި ދިރިއުޅުން ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ ޙަމްދާން ޝަކީލްއެވެ.މި އެއްބަސްވުމުގެ ދަށުން އެރަށު ސްކޫލުގައި 6 ކްލާސްރޫމާއި، މަލްޓިޕަރޕަސް ހޯލާއި، ލައިބްރަރީ އަދި ސައިންސް ލެބެއް ތަރައްޤީކުރުމަށް ވަނީ ހަމަޖެހިފައެވެ.