ކެނެޑާގެ އެހީގައި ރާއްޖޭގައި ތިމާވެށި ދިރާސާކުރަނީ

ކެނެޑާ ސަރުކާރުގެ އެހީގައި ރާއްޖޭގައި މޫސުމާއި ތިމާވެށީގެ ދިރާސާތައް ކުރިއަށް ގެންދިއުމަށްޓަކައި އެކުލަވާލެވޭ އޮނިގަނޑެއްގެ މަޝްވަރާތައް ފަށައިފި އެވެ.

މިކަމާ ގުޅޭގޮތުން ކެނެޑާގެ ސެކަންޑް ސެކްރެޓަރީ ޕެޓްރިކް ޕިކަރިންގ ވަނީ މިއަދު ރާއްޖޭގެ ޓްރާންސްޕޯޓް އެންޑް ސިވިލް އޭވިއޭޝަން މިނިސްޓްރީގެ އިސް ބޭފުޅުންނާ ބައްދަލުކުރައްވާފައެވެ.

މި ބައްދަލުވުމުގައި މަޝްވަރާކުރެވުނީ ކެނެޑާގެ ފަންނީ އެހީތެރިކަމުގެ ޕާޓްނަރޝިޕް ޕްރޮގްރާމްގެ ދަށުން ކުރިއަށްގެންދެވޭ "އެކްސްޕަރޓް ޑިޕްލޯއިމަންޓް މެކޭނިޒަމް" މަޝްރޫޢުގެ ތެރެއިން ރާއްޖޭގައި މޫސުމާއި ތިމާވެށީގެ ދިރާސާތައް ކުރުމަށް އެކުލަވާލެވޭ އޮނިގަނޑާ ބެހޭގޮތުންނެވެ. މި މަޝްރޫޢުގައި ދިވެހިރާއްޖޭގެ ޤައުމީ ޔުނިވަރސިޓީވެސް ބައިވެރިވެއެވެ.

ޓްރާންސްޕޯޓް މިނިސްޓްރީގެ އިސްވެރިއެއް ވިދާޅުވި ގޮތުގައި މި އޮނިގަނޑުގެ ސަބަބުން ރާއްޖޭގެ މޫސުމަށް އަންނަ ބަދަލުތަކާއި ތިމާވެށީގެ ކަންކަން ދެނެގަތުމަށް ފަސޭހަވެގެންދާނެއެވެ. އަދި މިކަމުގެ ސަބަބުން ރާއްޖޭގެ ދެމެހެއްޓެނިވި ތަރައްޤީއަށް މަގުފަހިވެގެންދާނެ ކަމަށް އެ ބޭފުޅާ ވިދާޅުވިއެވެ.

ކެނެޑާގެ ސެކަންޑް ސެކްރެޓަރީ ޕެޓްރިކް ޕިކަރިންގ ވިދާޅުވީ ރާއްޖެއަކީ މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާނެ ޤައުމުތަކުގެ ތެރޭގައި ހިމެނޭ ޤައުމެއް ކަމަށާއި، އެހެންކަމުން މިފަދަ ދިރާސާތަކަކީ ވަރަށް މުހިންމު ކަމެއް ކަމުގައެވެ.

މި މަޝްރޫޢުގެ ދަށުން ކުރިއަށް އޮތް ތަނުގައި ރާއްޖޭގެ ތިމާވެށި ރައްކާތެރިކުރުމަށާއި މޫސުމަށް އަންނަ ބަދަލުތަކާ ގުޅޭ ގިނަ ދިރާސާތަކެއް ކުރެވިގެންދާނެ ކަމަށް ބެލެވެއެވެ.