ހުޅުމާލޭ އިންޖީނުގޭގައި ތެޔޮ ޓޭންކުތައް ގާއިމްކުރުމުގެ މަޝްރޫއު: ޓޭންކުތަކުގެ ފައުންޑޭޝަން ބީމް ކާސްޓިންގ މަސައްކަތް ނިމިއްޖެ

ސްޓެލްކޯގެ ހުޅުމާލޭ އިންޖީނުގޭގައި ބަހައްޓާ ތެޔޮ ރައްކާކުރާ ޓޭންކުތައް ގާއިމްކުރުމުގެ އަމަލީ މަސައްކަތް ފަށައިފި އެވެ.

ޕީކް ސީޒަނަށް ތައްޔާރުވުމުގެ އިތުރުން ގްރޭޓާ މާލެ ޕަވަ ޖެނެރޭޝަން ބެކަޕްގެ ގޮތުގައި ހުޅުމާލެ ފުރަތަމަ ފިޔަވަހީގައި ގާއިމުކުރާ ހުޅުމާލެ ޕަވަހައުސް އެނެކްސް ދޭއްގައި ބަހައްޓާ 80،000 ލީޓަރުގެ ދެ ތެޔޮ ޓޭންކުތައް ގާއިމްކުރުމުގެ މަސައްކަތް ސްޓެލްކޯއިން އެމްޓީސީސީއާއި ހަވާލުކުރީ މިދިޔަ މަހުގެ 10 ވަނަ ދުވަހު އެވެ.

މި މަޝްރޫއުގެ އެންމެ ފަހުގެ އަދާހަމަ މައުލޫމާތު ހާމަކުރަމުން އެމްޓީސީސީން ބުނީ މި ޓޭންކުތަކުގެ ފައުންޑޭޝަން ބީމް ކާސްޓިންގެ މަސައްކަތް މިހާރު ނިމިފައިވާ ކަމަށާއި ޓޭންކުތައް ފެބްރިކޭޓް ކުރުމާއި ގްރައުންޑް ސްލެބް ކާސްޓިންގެ މަސައްކަތް މިހާރު ކުރަމުންދާ ކަމަށެވެ.

އެމްޓީސީސީން ބުނީ މި މަޝްރޫއު ނިމުމާއި އެކު ޕީކް ގަޑިތަކުގައި ކަރަންޓު ބޭނުންކުރާ މިންވަރާ އެއްވަރަށް ތެޔޮ ފޯރުކޮށްދިނުމުގެ ގާބިލުކަން އިތުރުކުރެވި، ސްޓެލްކޯގެ ހިދުމަތްތައް ފޯރުކޮށްދިނުމުގައި އެކުންފުންޏަށް އޮންނަ އިތުބާރު ކަށަވަރުކުރެވިގެންދާނެ ކަމަށެވެ.