އެސްޓޯނިއާއާ އެކު ރާއްޖެއިން ޕޮލިޓިކަލް ކޮންސަލްޓޭޝަން ފެށުމުގެ ފަހުމުނާމާގައި ސޮއިކޮށްފި

އެސްޓޯނިއާއާ ރާއްޖެ އާއި ދެމެދު ޕޮލިޓިކަލް ކޮންސަލްޓޭޝަން ފެށުމުގެ އެމްއޯޔޫގައި ސޮއިކޮށްފި އެވެ.

މި އެއްބަސްވުމުގައި ސޮއިކޮށްފައިވަނީ މިހާރު ރައީސް ޑރ މުހައްމަދު މުއިއްޒު އެގައުމަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެސްޓޯނިއާގެ ޚާރިޖީ ވުޒާރާގެ ސެކެޓްރީ ޖެނެރަލް، ޖޮނަތަން ސެވިއޮވް އާއި އެކު ރައީސް އާއި ރާއްޖޭގެ ވަފުދުން ބޭއްވި ބައްދަލުކުރެެއްވުމުގައި އެވެ.

މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ ޚާރިޖީ ވަޒީރު ޑޮކްޓަރ ޢަބްދުﷲ ޚަލީލެވެ. އެސްޓޯނިއާގެ ޚާރިޖީ ވަޒީރުގެ ބަދަލުގައި މި ފަހުމުނާމާގައި ސޮއިކުރެއްވީ، އެސްޓޯނިއާގެ ޚާރިޖީ ވުޒާރާގެ ސެކެޓްރީ ޖެނެރަލް، ޖޮނަތަން ސެވިއޮވްއެވެ.

ރައީސް އޮފީހުން ބުނީ މިފަހުމުނާމާއަކީ ދެޤައުމުގެ މެދުގައި ގުޅުން ބަދަހިކުރުމާއި ދެ ޤައުމުން އެކުގައި މަސައްކަތްކުރެވިދާނޭ ދާއިރާތައް ފުޅާކުރުމަށް އެޅިގެންދާ ހަރުދަނާ ފިޔަވަޅެއް ކަމަށެވެ.

މި ފަހުމުނާމާގައި ސޮއިކުރެއްވުމަށްފަހު ރާއްޖޭގެ ހާރިޖީ ވަޒީރު ޙަލީލް އެކްސްގައި ކުރެއްވި ޕޯސްޓެއްގައި ވިދާޅުވީ މި މުހިންމު ފަހުމުނާމާގެ ސަބަބުން ދެ ޤައުމުގެ މަސްލަހަތު ހިމެނޭ ދާއިރާތަކާ ބެހޭގޮތުން އެކި ފަހަރުމަތިން މަޝްވަރާކޮށްގެން ދެޤައުމުގެ ގުޅުން އިތުރަށް ބަދަހިވެގެންދާނެ ކަމަށެވެ. އަދި ރާއްޖެއިން އޮތީ އެސްޓޯނިއާއާއި އެކު ކުރިޔަށް އޮތް އަހަރުތަކުގައި ގުޅުން ބަދަހިކުރުމުގެ ނިޔަތުގައިކަންވެސް ހަލީލް ފާހަގަކުރެއްވި އެވެ.