ޓުއަރިސްޓު ވިސާގައި ރާއްޖެ އެތެރެވެ ވިޔާފާރިކުރަމުން ދިޔަ ދެ ބިދޭސީއަކު އިމިގްރޭޝަންގެ ބެލުމުގެ ދަށަށް!

ރާއްޖެއަށް ޓުއަރިސްޓު ވިސާގައި އެތެރެވެ ވިސާގެ ގަވާއިދުތަކާއި ގިލާފުވި ދެބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފި އެވެ.

އިމިގްރޭޝަނުން މިއަދު ބުނީ އާންމުންގެ ކަންބޮޑުވުންތަކާ ގުޅިގެން އެއިދާރާއިން ޓޫރިސްޓް ވިސާގެ ގަވާއިދާ ހިލާފުވި ދެ ބިދޭސީއަކު ހިފަހައްޓައިފައިވާ ކަމަށެވެ.

އަދި އެ މީހުންނަކީ ޓޫރިސްޓް ވިސާގައި އުޅެނިކޮށް ހުއްދަ ނޫން ވިޔަފާރީގެ ހަރަކާތްތަކުގައި އުޅުނު މީހުން ކަމަށާއި އެ މީހުންނަކީ ގަވާއިދާ ހިލާފަށް އާންމު ތަންތަނުގައި ދިރިއުޅެމުން އަންނަ މީހުން ކަމަށްވެަސް ވަނީ ބުނެފައި އެވެ.

އިމިގްރޭޝަނުން ހިފެހެއްޓީ ސީރިއާއަށް ނިސްބަތްވާ އުމުރުން 19 އަހަރުގެ އަންހެނަކާއި ޖޯޑަންއަށް ނިސްބަތްވާ 24 އަހަރުގެ ފިރިހެނެކެވެ.

އިމިގްރޭޝަނުން ބުނީ މި މީހުން ރާއްޖެ ޑީޕޯޓުކޮށްލުމުގެ މަސައްކަތް މިހާރު ދަނީ ކުރަމުން ކަމަށެވެ.

އިމިގްރޭޝަނުން ވަނީ އެއިދާރާގެ ރިޕޯޓިންގ ޕްލެޓްފޯމް އިމިގްރޭޝަން ވޮޗް މެދުވެރިކޮށް މިފަދަ ފަރާތްތައް ރިޕޯޓުކުރުމަށް އެދިފައި އެވެ.