ރާއްޖޭގެ އެކި ކަންކޮޅުތަކުގައި ހިންގާ ހައުސިން މަޝްރޫއުތަކަށް ކޮންޓްރެކްޓަރުން ހޯދަން މިމަހު އިއުލާނުކުރަނީ

ރާއްޖޭގެ އެކި ކަންކޮޅުތަކުގައި ހިންގާ ހައުސިން މަޝްރޫއުތަކަށް ކޮންޓްރެކްޓަރުން ހޯދަން މިހިނގާ ޖެނުއަރީ މަހުގެ ތެރޭގައި އިއުލާނުކުރާނެ ކަން ރައީސް ޑރ މުހައްމަދު މުއިއްޒު ހާމަކުރައްވައިފި އެވެ.

ރައީސް މިކަން ހާމަކުރެއްވީ މިހާރު ކ ގުޅިއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި އެވެ.

ރައީސް ވިދާޅުވީ އެމަނިކުފާނުގެ ރިޔާސީ ވައުދުފުޅުތަކުގެ ތެރެއިން ރާއްޖޭގެ އެކި ކަންކޮޅުތަކުގައި ހިންގާނެ ކަމަށް ވައުދުވެވަޑައިގެންނެވި ހައުސިންގ މަޝްރޫއުތަކަށް ކޮންޓްރެކްޓަރުން ޙޯދަން އިއުލާނުކުރުމަށް ތައްޔާރުވަމުން ދާކަމަށާއި އެހުރިހާ މަޝްރޫއުތަކަށް ކޮންޓްރެކްޓަރުން ހޯދަން މިހިނގާ ޖެނުއަރީ މަހުގެ ތެރޭގައި އިއުލާނުކުރާނެ ކަމަށެވެ.

އެގޮތުން މަޝްރޫއުތައް ހަވާލުކުރެވޭ ތަރުތީބުން އަމަލީ މަސައްކަތްތައްވެސް މިފެށުނު 2025 ގައި ފެށިގެން ދާނެ ކަމަށާއި މި އަހަރު ވެގެންދާނީ ބޯހިޔާވަހިކަމުގެ އެންމެ ގިނަ މަޝްރޫއުތައް އެއް އަހަރުގެ ތެރޭގައި ކުރިޔާށް ގެންދާނެ އަހަރުކަން ރައީސް ފާހަގަކުރެއްވި އެވެ.

2023 ވަނަ އަހަރުގެ ރިޔާސީ އިންތިހާބުގެ ކެމްޕެއިންގައި އެކި ރަށްރަށަށް ކުރެއްވި ދަތުރުފުޅުތަކުގައި އޭރުގެ ރިޔާސީ ކެނޑިޑޭޓު އަދި މިހާރުގެ ރައީސް ޑރ މުހައްމަދު މުއިއްޒު ވަނީ އެރަށްތަކުގައި ހައުސިންގ މަޝްރޫއުތައް ހިންގާނެ ކަމަށް ވައުދުވެވަޑައިގެންފައި އެވެ.\