ޤައުމީ ކެޑޭޓް ކޭމްޕުގެ ޕާސިންގ އައުޓް ޕެރޭޑް ރަސްމިއްޔާތު ބާއްވައިފި

ދިވެހި ރާއްޖޭގެ ކެޑޭޓުންނަށް އަމާޒުކޮށްގެން އެމްއެންޑީއެފުން ހިންގި 24 ވަނަ ޤައުމީ ކެޑޭޓް ކޭމްޕުގެ ޕާސިންގ އައުޓް ޕެރޭޑް ރަސްމިއްޔާތުގައި ބާއްވައިފިއެވެ.

ގިރިފުށީ ޓްރެއިނިންގ ސެންޓަރުގައި އިއްޔެ ބޭއްވި މި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.

2024 ޑިސެންބަރު 21 އިން 2025 ޖަނަވަރީ 1 ވަނަ ދުވަހުގެ ނިޔަލަށް ކުރިޔަށްގެންދިޔަ މި ކޭމްޕުގައި ރާއްޖޭގެ އެކިކަންކޮޅުތަކުން 44 ސްކޫލަކުން، 120 ދަރިވަރުން ބައިވެރިވިއެވެ. މީގެތެރޭގައި ހިމެނެނީ، 66 ފިރިހެން ދަރިވަރުންނާއި 54 އަންހެން ދަރިވަރުންނެވެ. މީގެއިތުރުން، އިންޓަނޭޝަނަލް ކެޑޭޓް އެކްސްޗޭންޖް ޕްރޮގްރާމުގެ ތެރެއިން އިންޑިއާ، ސްރީލަންކާ އަދި ނޭޕާލް ހިމެނޭހެން، 12 ކެޑޭޓުންނާއި އެ ޤައުމުތަކުގެ ޑެލިގޭޝަންގައި ހިމެނޭ 3 އޮފިސަރުން ވަނީ މި ކޭމްޕަށް ޒިޔާރަތްކޮށްފައެވެ.

މި ރަސްމިއްޔާތުގައި ވަނަވަނައަށް ހޮވުނު ކެޑޭޓުންނަށް ތަށްޓާއި ޝީލްޑް ހަވާލުކޮށްދެއްވީ، ޝަރަފުވެރި މެހެމާނު، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ. 24 ވަނަ ޤައުމީ ކެޑޭޓް ކޭމްޕްގެ އެންމެ މޮޅު ފިރިހެން ދަރިވަރުގެ މަޤާމު ހާސިލުކުރީ، އއ.މަތިވެރި ސްކޫލުގެ، ކެޑޭޓް ކޯޕްރަލް މުޙައްމަދު ޒިމްޔާންއެވެ. އެންމެ މޮޅު އަންހެން ދަރިވަރުގެ މަޤާމު ހާސިލުކުރީ އަޙްމަދިއްޔާ އިންޓަނޭޝަނަލް ސްކޫލުގެ، ކެޑޭޓް ކޯޕްރަލް ފާޠިމަތު މައިހާ މުޙައްމަދެވެ. އެކަޑެމިކް މާއްދާތަކުން އެންމެ މޮޅު ދަރިވަރުގެ މަޤާމު ހާސިލުކުރީ މާފުށީ ސްކޫލުގެ، ކެޑޭޓް ސާޖަންޓް ޝައިމް ޝުވައިޒް އާދަމްއެވެ. އަދި އެންމެ މޮޅު ޕްލެޓޫންގެ މަޤާމު ހާސިލުކުރީ މައިކް ޕްލެޓޫންއެވެ.

އިންޓަނޭޝަނަލް ކެޑޭޓް އެކްސްޗޭންޖް ޕްރޮގްރާމުގެ ދަށުން މި ކޭމްޕުގައި ބައިވެރިވި ޤައުމުތަކުގެ ޑެލިގޭޝަންގެ އޮފިސަރުންނަށް މި ރަސްމިއްޔާތުގައި ވަނީ ބެޖު ހަވާލުކޮށްދެއްވާފައެވެ. އެފަރާތްތަކަށް ބެޖު ހަވާލުކޮށްދެއްވީ، އެމްއެންޑީއެފް ކޮލެޖް އޮފް ޑިފެންސް އެންޑް ސެކިޔުރިޓީ ސްޓަޑީޒް އަދި ނޭޝަނަލް ކެޑޭޓް ކޯރގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް ޢަބްދުﷲ އިބްރާހީމްއެވެ. އަދި، އެ ޤައުމުތަކުގެ ކެޑޭޓުންނަށް ބެޖު ހަވާލުކޮށްދެއްވީ، ނޭޝަނަލް ކެޑޭޓް ކޯރގެ ޑިރެކްޓަރ، ނޭޝަނަލް ކެޑޭޓް ކޯރގެ ކާނަލް މުޙައްމަދު އަޝްރަފްއެވެ.

މި ކޭމްޕުގައި ކިޔަވައިދީފައިވަނީ އެމްއެންޑީއެފްގެ މުދައްރިބުންނެވެ. އަދި އެމްއެންޑީއެފްގެ މުދައްރިބުންނާއެކު، ޤައުމީ ކެޑޭޓް ކޯރގެ މުދައްރިބުންގެ ޓީމެއް މި ކޭމްޕްގައި ހަރަކާތްތެރިވެފައިވެއެވެ.

ކެޑޭޓް ކޭމްޕްގެ މަޤްޞަދަކީ، ކޮންމެ ކެޑޭޓަކީ ވެސް މުޖުތަމަޢުއަށް ފައިދާހުރި އަދި ދިމާވާ އެކިއެކި ޙާދިސާތަކުގައި ރޭވުންތެރިކަމާ އެކު އެހީތެރިކަން ފޯރުކޮށްދިނުމުގެ ޤާބިލުކަން ހުރި ޒިންމާދާރު ރައްޔިތަކަށް ހެދުމާއި، ކޭމްޕްގައި ބައިވެރިވާ ކެޑޭޓުންނަކީ ހަރުދަނާ އަޚުލާޤާއި ރިވެތި ސުލޫކެއްގެ ވެރިބަޔެއްގެ ގޮތުގައި ބިނާކުރުމާއި، ކެޑޭޓުންގެ މެދުގައި ދީނީ އަދި ޤަޢުމީ ރޫޙް އާލާކޮށް ދިރުވުމާއި، ދިވެހި އަސްކަރިއްޔާގެ އުނގެނުމުގެ ވެއްޓެއްގައި ނަފުސު ތަރުބިޔަތުކޮށް ބައްޓަން ކުރުމުގެ ފުރުޞަތު ޤައުމީ ކެޑޭޓުންނަށް ފަހިކޮށްދިނުމާއި، އަސްކަރީ ހުނަރުތަކުގެ ތެރެއިން ކަނޑައެޅޭ ބައެއް އަސާސީ ހުނަރުތައް ކެޑޭޓުންނަށް ތަޢާރަފު ކޮށްދިނުމާއި، ޤައުމީ ކެޑޭޓުންގެ މެދުގައި އެކުވެރިކަމާއި އެއްބައިވަންތަކަން ޢާލާކުރުމާއި، އަދި އަސްކަރީ ހުނަރުތަކުގެ ތެރެއިން ކަނޑައެޅޭ ބައެއް އަސާސީ ހުނަރުތައް ކެޑޭޓުންނަށް ތަޢާރަފުކޮށްދިނުމެވެ.

މި ކޭމްޕްގެ ޕާސިންގ އައުޓް ޕެރޭޑް ރަސްމިއްޔާތުގައި އެމްއެންޑީއެފް ކޮލެޖް އޮފް ޑިފެންސް އެންޑް ސެކިޔުރިޓީ ސްޓަޑީޒްގެ ޑެޕިއުޓީ ކޮމާންޑިންގ އޮފިސަރ އަދި ކެޑޭޓް ކޯރގެ އެޖުޓަންޓް، ކާނަލް ޔޫސުފް ރަޝީދުއާއި، ކޭމްޕް ކޮމާންޑަރ، ކެޕްޓަން އަޙްމަދު ވިޝާންއާއި، ޗީފް އިންސްޓްރަކްޓަރ، ކެޕްޓަން ޙަސަން އަކްރަމްއާއި، އެގްޒެކްޓިވް އޮފިސަރ، ފަސްޓް ލެފްޓިނެންޓް ޔާސިރު ޢަބްދުލް ޤާދިރުއާއި، ސީނިއަރ އެންލިސްޓެޑް ލީޑަރ، ފަސްޓް ސާޖަންޓް އަޙްމަދު ލަޠީފްއާއި، އެމްއެންސީސީގެ އޮފިސަރުންނާއި އަދި ކެޑޭޓް ކޭމްޕްގެ އިންސްޓްރަކްޓަރުންނާއި އަދި ކެޑޭޓް ދަރިވަރުންގެ ބެލެނިވެރިން ބައިވެރިވެލެއްވިއެވެ.