ވާދަވެރި ކުޅުމަކަށްފަހު ގެމަނަފުށިން ދާންދޫ ބަލިކޮށްފި

ގައްދޫގައި މިހާރު ކުރިޔަށްދާ " ބީ ބޯލްޑް ހުވަދޫ ވަތަބަނޑޭރި ވޮލީބޯލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅުނު ދެވަނަ މެޗުގައި ގެމަނަފުށީ ވޮލީބޯޅަ ކުލަބާއި ދާންދޫ ކުޅުނު މެޗު ވާދަވެރި ކުޅުމަކަށްފަހު 3-2 ގެ ނަތީޖާއަކުން ކާމިޔާބުކޮށް ގެމަނަފުށިން މުބާރާތުގެ ފުރަތަމަ މޮޅު ހޯދައިފިއެވެ.

މުބާރާތުގައި ގެމަނަފުށި ކުޅުނު ފުރަތަމަ މެޗުގައި 3-0 ގެ ނަތީޖާއަކުން ކުލަބު ބޮއްކުރާ އަތުން އެޓީމު ވަލިވެފައިވާއިރު، މިއީ ދާންދޫ ޓީމުން މުބާރާތުގައި ކުޅުނު ފުރަތަމަ މެޗެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ސެޓް ނުވަ ޕޮއިންޓްގެ ލީޑަކާއެކު 16-25 ގެ ނަތީޖާއަކުން ކާމިޔާބުކުރީ ގެމަނަފުށިންނެވެ. ނަމަވެސް ޖެހިގެއައި ދެވަނަ ސެޓުގައި ދާންދޫ ޓީމު ވަނީ އެޓީމު ކުޅުން ރަނގަޅުކޮށް އަށް ލަނޑުގެ ލީޑަކާއެކު 17-25 ގެ ނަތީޖާއަކުން މި ސެޓް ކާމިޔާބުކޮށްފައެވެ.

މެޗުގެ ފުރަތަމަ ދެ ސެޓާއި ޚިލާފަށް ތިންވަނަ ސެޓުގައި ދެ ޓީމުގެ ފަރާތުން ފެނިގެންގޮސްފައިވަނީ ވަރަށް ހަމަހަމަ ކުޅުމެކެވެ. އަދި މިސެޓް 23-25 ގެ ނަތީޖާއަކުން ކާމިޔާބުކުރީ ގެމަނަފުށީ ޓީމުންނެވެ. އަދި ޖެހިގެންއައި ހަތަރުވަނަ ސެޓު ވެސް ވަރުގަދަކޮށް ފެށީ ގެމަނަފުށީ ޓީމުންނެވެ. އަދި ސެޓުގެ ކުރީކޮޅު އެޓީމުން ބޮޑު ލީޑެއްވެސް ހޯދިއެވެ.

ނަމަވެސް ދާންދޫ ޓީމުން ދޫނުދީ ކުރި ހިތްވަރުގެ ނަތީޖާއެއްގެ ގޮތުން އެޓީމުން ވަނީ ފަހަތުން އަރައި ފަސް ޕޮއިންޓްގެ ލީޑަކާއެކު 20-25 ގެ ނަތީޖާއަކުން މެޗުގެ ހަތަރުވަނަ ސެޓް ކާމިޔާބުކޮށްފައެވެ.

މިއާއެކު މެޗުގެ ނަތީޖާ ނެރުމަށްޓަކައި ކުޅެވުނު، (15 ޕޮއިންޓް)ގެ ފަސްވަނަ ސެޓް 10-15 ގެނަތީޖާއަކުން ކާމިޔާބުކުރީ ގެމަނަފުށީ ޓީމުންނެވެ. އަދި މިމެޗުގެ މޮޅު ކުޅުންްތެރިއަކަށް ހޮވުނީ ގެމަނަފުށީ ޓީމުގެ އަލީ އަސަދު އެވެ.

ގައްދޫ ކައުންސިލްގެ ފަރާތުން އިންތިޒާމްކޮށް މުޅި ހުވަދު އަތޮޅަށް ހުޅުވާލައިގެން ބާއްވާ މިމުބާރާތުގެ ފިރިހެން ޑިވިޝަނުގައި މިއަހަރު ފަސް ޓީމަކުން ބައިވެރިވެފައިވާއިރު، މި ޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ފަސް ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗުކުޅެ ލީގުބުރުގެ އެއްވަނަ ހޯދާ ޓީމަކަށް މުބާރާތުގެ ފައިނަލްގެ ފުރަތަމަ ޖާގަ ލިބޭގޮތަށެެވެ.

މީގެ އިތުރުން ލީގުބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބިގެންދާނެއެވެ.

23 ޑިސެންބަރު 2024 އިން 1 ޖެނުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 55،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައި ވާއިރު، މުބާރާތުގެ ޓައިޓަލް ސްޕޮންސަރ އަކީ ބީ ބޯލްޑް ޕްރައިވެޓް ލިމިޓެޑެވެ. އަދި މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރުމަށް ހަމަޖެހިފައިވާއިރު، މުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.