ނައިބު ރައީސް ޗައިނާއަށް!

ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ރަސްމީ ދަތުރުފުޅެއްގައި ޗައިނާއަށް ފުރާވަޑައިގެންފި އެވެ.

ނައިބު ރައީސްގެ މި ދަތުރުފުޅަކީ ތިންވަނަ ޗައިނާ-އިންޑިއަން އޯޝަން ރީޖަން ފޯރަމް އޮން ބްލޫ އިކޮނޮމީ ޑިވެލޮޕްމަންޓް ކޯޕަރޭޝަން ގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.

ނައިބު ރައީސް ޗައިނާގެ ޔުނާން ޕްރޮވިންސްގެ ކުންމިންގއަށް ކުރައްވާ މި ދަތުރުފުޅަކީ ޑިސެމްބަރު މަހުގެ 15 އިން 17 އަށް ރާއްޖެއިން ކޯ-ހޯސްޓްކުރާ ފޯރަމްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.

ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސީއައިޑީސީއޭ) އިން އިންތިޒާމްކޮށްގެން ކުރިއަށް ގެންދާ މި ހަރަކާތަކީ މޫސުމަށް އަންނަ ބަދަލުތަކާއި ދެމެހެއްޓެނިވި ތަރައްގީގެ އިތުރުން ނޫ އިގްތިސާދުގެ އެކި ކަންކަމަށް އަލިއަޅުވާލައި ޗައިނާ އާއި އިންޑިއާ ކަނޑުގެ ސަރަހައްދުގެ ގައުމުތަކުގެ މެދުގައި ގުޅުން ބަދަހިކުރުމުގެ މަގްސަދުގައި ކުރިއަށް ގެންދާ ހަރަކާތެކެވެ.

"ފިއުޗަރ އޮފް ދަ ބްލޫ އިންޑިއަން އޯޝަން: ޑިވެލޮޕްމަންޓް ޕްރެކްޓިސްސް އޮފް ދަ ގްލޯބަލް ސައުތު" ގެ ނަމުގައި ކުރިއަށްގެންދާ ތިންވަނަ ފޯރަމްގައި ދުނިޔޭގެ އެކި ކަންކޮޅުތަކުން ބައިވެރިވާ ފަރާތްތަކަށް ތަފާތު ތީމެޓިކް ޑިސްކަޝަންތަކާއި ސަބްފޯރަމްތަކާއި ރައުންޑްޓޭބަލް ޑިސްކަޝަންތައް ކުރިއަށްގެންދިއުމަށް ވަނީ ހަމަޖެހިފައެވެ.

ޗައިނާ ސަރުކާރުގެ ދައުވަތަކަށް ބާއްވާ މި ފޯރަމްގައި ނައިބު ރައީސް ބައިވެރިވެވަޑައިގަންނަވާއިރު، މި ފޯރަމް ފެށުމުގެ ރަސްމިއްޔާތުގައި ވާހަކަފުޅު ދެއްކެވުމަށް ވަނީ ހަމަޖެހިފައެވެ. މީގެ އިތުރުން 2023 ވަނަ އަހަރުގެ ޑިސެމްބަރު މަހު ޗައިނާގައި ބޭއްވި ދެވަނަ ޗައިނާ އިންޑިއަން އޯޝަން ރީޖަން ފޯރަމްގައި ވެސް ނައިބު ރައީސް ބައިވެރިވެވަޑައިގެންނެވި އެވެ.