17 އަހަރުންދަށް އަންހެން: އިތުރުވަގުތު ކުޅެ ގާޒީ ސްކޫލް ބަލިކޮށް ހަމަދު ސްކޫލް ފައިނަލުން ޖާގަ ހޯދައިފި

މިހާރު ކުރިއަށްދާ 7 ވަނަ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުންދަށުގެ އަންހެން ސެމީ ފައިނަލް ދެވަނަ މެޗުގައި ހަމަދު ސްކޫލާއި ޤާޒީ ސްކޫލް ކުޅުނު މެޗު 17-17 ގެ ނަތީޖާއަކުން އެއްވަރު ނަތީޖާ ނެރުމައްޓަކައި ކުޅުނު ފަސް މިނެޓުގެ ދެހާފުގައި ކާމިޔާބުކުރި ލަނޑުތަކާއެކު 21-19 ގެ ނަތީޖާއަކުން މޮޅުވެ ހަމަދު ސްކޫލް މުބާރާތުގެ ފައިނަލުން ޖާގަ ހޯދައިފިއެވެ.

ޤާޒީ ސްކޫލް މުބާރާތުގެ ސެމީ ފައިނަލުން ޖާގަ ހޯދީ ކުއާޓާ ފައިނަލް ހަތަރުވަނަ މެޗުގައި ވާދަވެރި ކުޅުމަކަށްފަހު 15-16 ގެ ނަތީޖާއަކުން ހިރިޔާ ސްކޫލް ބަލިކުރުމަށްފަހު އެވެ. އަދި ހަމަދު ސްކޫލް ސެމީ ފައިނަލުން ޖާގަ ހޯދީ ކުއާޓާ ފައިނަލުގެ ދެވަނަ މެޗުގައި 18-14 ގެ ނަތީޖާއަކުން އުކުޅަހު ސްކޫލް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ފޯރިގަދަ އަވަސް ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 6-8 ގެ ނަތީޖާއަކުން ހަމަދު ސްކޫލް ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ޤާޒީ ސްކޫލުން ވަނީ އެޓީމުގެ ކުޅުންރަނގަޅުކޮށް އެޓީކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ހާފުގައި ޤާޒީ ސްކޫލުން އިތުރު 11 ލަނޑު ކާމިޔާބުކުރިއިރު، މިހާފުގައި ހަމަދު ސްކޫލަށް ކާމިޔާބުކުރެވުނީ އިތުރު ނުވަ ލަނޑެވެ. މިއާއެކު މެޗުގެ ފުރިހަމަ ވަގުތުވީއިރު ދެޓީމު އޮތީ 17-17 ގެ ނަތީޖާއަކުން އެއްވަރުވެފައެވެ. އަދި މެޗުގެ ނަތީޖާ ނެރުމައްޓަކައި ކުޅެވުނު ފަސް މިނެޓުގެ ދެހާފުގައި ހަމަދު ސްކޫލުން އިތުރު ހަތަރު ލަނޑު ކާމިޔާބުކުރިއިރު، ޤާޒީ ސްކޫލުން ވަނީ އިތުރު ދެލަނޑު ކާމިޔާބުކޮށްފައެވެ.

އެގޮތުން މިމެޗުގައި ހަމަދު ސްކޫލްގެ އާމިނަތު ސާއީ އަަލީ ޝަމީމް 10 ލަނޑު ކާމިޔާބުކުރިރިރު، އެޓީމުގެ ނައުފާ ޒާހިރު ފަސް ލަނޑު އަދި އައިޝަތު ޔަޝްކާ ޔޫސުފު ވަނީ ތިން ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ތޫބާ ބިންތު އަހުމަދު ދެ ލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އައިޝަތު އަފާފް އާދިލް އެވެ.

މީގެ އިތުރުން މިމެޗުގައި ގާޒީ ސްކޫލްގެ މަރިޔަމް ޔުމްނު ޝިފާއު އަށް ލަނޑު ކާމިޔާބުކުރިއިރު، އެޓީމުގެ ހައްވާ ސަމާހާ މުހައްމަދު ހަތަރު ލަނޑު އަދި އާމިނަތު ޝަހާމާ މުހައްމަދު ވަނީ ތިން ލަނޑު ކާމިޔާބުކޮށްފައެވެ. އަދި މީގެ އިތުރުން މިމެޗުގައި އެޓީމުގެ ޝުއާ އަހުމަދު ރިފްޝާން ދެލަނޑު ކާމިޔާބުކުރިއިރު، އައިނީ މުންތާޒް އަދި އައިޝަތު ޒާރާ ބިންތު އިސްމާއިލް މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ހަމަދު ސްކޫލްގެ އާމިނަތު ސާއީ އަަލީ ޝަމީމް އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 17 އަހަރުން ދަށުގެ އަންހެން ޑިވިޝަނުގައި ޖުމްލަ 23 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 23 ޓީމު ފަސް ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ޓީމުގެ އިތުރުން ފަސް ގުރޫޕުން ދެވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.