15 އަހަރުންދަށް ފިރިހެން: ކަލާފާނު ބަލިކޮށް ފައިނަލުގެ ދެވަނަ ޖާގަ ޅ. އޭއީސީއަށް

މިހާރު ކުރިއަށްދާ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުންދަށުގެ ފިރިހެން ސެމީ ފައިނަލް ދެވަނަ މެޗުގައި ވާދަވެރި ކުޅުމަކަށްފަހު 10-7 ގެ ނަތީޖާއަކުން ކަލާފާން ސްކޫލް ބަލިކޮށް ޅ. އަތޮޅު ތައުލީމީ މަރުކަޒް (ޅ.އޭއީސީ) މުބާރާތުގެ ފައިނަލުން ޖާގަ ހޯފައިފިއެވެ.

މެޗުގެ ފުރަތަމަ ހާފުގައި މޮޅަށްކުޅެ ޅ.އޭއީސީ އިން މެޗު ޑޮމިނޭޓްކުރިއިރު،، ފުރަތަމަ ހާފުގެ ކުޅުން ނިމިގެންދިޔައީ ހަތަރު ލަނޑުގެ ލީޑާކާއެކު 6-2 ގެ ނަތީޖާއަކުން ޅ. އޭއީސީ ކުރީގައި އޮވެގެންނެވެ. ނަމަވެސް މެޗުގެ ދެވަނަ ހާފުގައި ކަލާފާން ސްކޫލުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި ކަލާފާން ސްކޫލުން އިތުރު ފަސް ލަނޑު ކާމިޔާބުކުރިއިރު، މިހާފުގައި ޅ.އޭއީސީއަށް ކާމިޔާބުކުރެވުނީ ހަތަރު ލަނޑެވެ.

އެގޮތުން މިމެޗުގައި ޅ.އޭއީސީގެ އައިލާން އައިވަން އަދި މުހައްމަދު ނާހު ހަސަން މިއިން ކޮންމެ ކުޅުންތެރިއަކު ހަތަރު ލަނޑު ކާމިޔާބުކުރިއިރު، އެޓީމުގެ އަބްދުލް ހައްޔު އަޝްފާއު އަބްދުﷲ އަދި އިބްރާހިމް ހުސާން ހުސެއިން މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ކަލާފާން ސްކޫލްގެ އަނޫފް މުހައްމަދު ޒެނިތު ފަސް ލަނޑު ކާމިޔާބުކުރިއިރު، އެޓީމުގެ އިސްމާއިލް ހާމް ހުސެއިން އަދި އިސްމާއިލް އިޔާން އަލީ މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޅ.އޭއީސީގެ އައިލާން އައިވަން އެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުން ދަށުގެ ފިރިހެން ޑިވިޝަނުގައި ޖުމްލަ 14ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 14ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.