ގްރީންޒޯނުގައި މުޒާހަރާކުރި ބިދޭސީންނާއި މެދު ފިޔަވަޅު އަޅާނީ މައްސަލަ އެއްކޮށް ތަހުގީގުކޮށް ނިމުމުން - ޝަމްއާން

މުސާރައިގެ މައްސަލާގައި މިއަދު މުޒާހަރާއަށް ނުކުތް ބިދޭސީންނާއި މެދު ފިޔަވަޅު އަޅާނީ މި މައްސަލައާ ގުޅިގެން ބަލަންޖެހޭ ކަންކަން ރަނގަޅަށް ބެލުމަށްފަހުގައި ކަމަށް އިމިގްރޭޝަންގެ ކޮންޓްރޯލަރު ޝަމްއާން ވިދާޅުވެއްޖެ އެވެ.

މުސާރަ ނުދޭ ކަމަށްބުނެ ބިދޭސީންތަކެއް މިއަދު އިހްތިޖާޖު ކުރަން ނުކުތީ ގްރީންޒޯން ސަރަހައްދަށެވެ. އެގޮތުން ފުލުހުން މިއަދު ބުނީ މުސާރަ ނުދޭ ކަމަށްބުނެ ބިދޭސީންތަކެއް މުލިއާގެ އާއި ހިސާބުގައި ހިތްހަމަނުޖެހުން ފާޅުކުރަމުންދާ މައްސަލައަކާއި ގުޅިގެން ފުލުހުން އެސަރަހައްދަށް އެޓެންޑު ވެފައިވާ ކަމަށެވެ. އަދި އެބިދޭސީންތައް އިމިގްރޭޝަނާއި ހަވާލުކޮށްފައިވާ ކަމަށެވެ.

މިކަމާއި ގުޅިގެން މުސާރަ ނުދިނުމުން ހައްގު ހޯދަން ނުކުތް ބިދޭސީންތަކަކާއި މެދު އިމިގްރޭޝަނުން ފިޔަވަޅުއެޅުމަކީ އިންސާނީ ހައްގުތަކާއި ހިލާފު ކަމެއް ކަމަށްބުނެ ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.

މިއާއި އެކު މިއަދު އެކްސްގައި ކުރެއްވި ޕޯސްޓެއްގައި ކޮންޓްރޯލަރު ޝަމްއާން ވިދާޅުވީ މިއަދު މާލޭގެ ގްރީން ޒޯނުގައި މުޒާހަރާކުރި 55 ބިދޭސީން ފުލުހުން ވަނީ އިމިގްރޭޝަނާއި ހަވާލުކޮށްފައި ކަމަށާއި މި މައްސަލައާ ގުޅިގެން ބަލަންޖެހޭ ކަންކަން މިވަގުތު ދަނީ ބަލަމުންކަމުން މި ބިދޭސީންނާ މެދު އަޅަންޖެހޭ ފިޔަވަޅެއް އަޅާނީ މައްސަލަ އެއްކޮށް ތަހުގީގުކޮށް ނިމުމުން ކަމަށެވެ.

އަދި މި ބިދޭސީންގެ ހައްގުތަކެއް ގެއްލިފައިވާކަމަށް އެފަރާތްތަކުން ބުނަމުންދާތީ، މިވަގުތު ލޭބަރ ރިލޭޝަންސް އޮތޯރިޓީގެ ބޭފުޅުންވެސް ދަނީ އިމިގްރޭޝަންގެ ޑިޓެންޝަން ސެންޓަރުގައި ހަރަކާތްތެރިވަމުން ކަންވެސް އިމިގްރޭޝަނުން ވަނީ ބުނެފައި އެވެ.

ޝަމްއާން އިތުރަށް ވިދާޅުވީ އިމިގްރޭޝަނުން ދޫކޮށްފައިވާ ހުއްދައިގެ ދަށުން ރާއްޖޭގައި އުޅޭ އެއްވެސް ފަރާތަކަށް ދިވެހިރާއްޖޭގައި ހެދިފައިވާ ޤާނޫނާއި ޤަވާއިދުތަކާއި ޚިލާފުވާކަށް ފުރުސަތެއް ނުދެވޭނެ ކަމަށާއި އަދި އެފަދަ ފަރާތްތާއިމެދު އިމިގްރޭޝަން ޤާނޫނުގެ ދަށުން ޢަމަލު ކުރެވޭނެ ކަމަށެވެ.