ދާންދޫ މަގުމަތީގައި ނިޔާވެފައި އޮތް ޒުވާނަކު ފެނިއްޖެ

ގއ. ދާންދޫ މަގުމަތީގައި ނިޔާވެފައި އޮތް މީހަކު މިއަދު ފެނިއްޖެއެވެ.

ފުލުހުން މިއަދު ބުނީ ދާންދޫ، ނަގަހެލަގޭ އަހުމަދު އަބްދުﷲ (33އ) އެރަށު ފެނަކަ ބްރާންޗްގެ ހުޅަނގު ފަރާތު މަގު މައްޗަށް ވެއްޓިފައި އޮތްކަމުގެ ރިޕޯޓް މިއަދު ހެނދުނު 8:10 ހާއިރު ފުލުހުން ލިބުނު ކަމަށެވެ.

އަދި މިއާއި އެކު ސީންއަށް ފުލުހުން ހާޒިރުވެ އޭނާ އެރަށު ހެލްތު ސެންޓަރަށް ގެންދިޔައިރުވެސް މަރުވެފައިވާ ކަމަށް އެ ސެންޓަރުން ފުލުހުންނަށް މައުލޫމާތު ދީފައިވާ ކަމަށެވެ.

މައުލޫމާތު ލިބޭގޮތުގައި އެރަށުގައި ފުލުހުންގެ ފޮރެންސިކް ޓީމެއް މިހާރު ދަނީ ހަރަކާތްތެރިވަމުންނެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.