"ޢުލޫމީ އަށި" އިފުތިތާހު ކޮށްފި

ނެޝަނަލް އިންސްޓިޓިއުޓް އޮފް އެޑިޔުކޭޝަން (އެންއައިއީ) ގެ މުވައްޒަފުންގެ މެދުގައި ފަންނީ މަޢުލޫމާތާއި، ތަމްރީނުތަކުން ލިބޭ ތަޖުރިބާ އަދި ދިރާސާތަކުން ހާސިލުކުރެވޭ މަޢުލޫމާތު ހިއްސާކުރުމަށް ޚާއްޞަކުރެވިފައިވާ މަންޞައެއް ކަމަށްވާ "ޢުލޫމީ އަށި" އިފުތިތާހުކޮށްފިއެވެ.

"ޢުލޫމީ އަށި" އިފްތިތާޙުކޮށްދެއްވައި، ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން، ޑޮކްޓަރ ޢަބްދުއްލަޠީފް މުޙައްމަދެވެ.

މި ރަސްމިއްޔާތުގައި ދެއްކެވި ވާހަކަފުޅުގައި ސްޓޭޓް މިނިސްޓަރ ޑރ.ލަޠީފް ވަނީ އެންއައިއީ ފަދަ އިންސްޓިޓިއުޓްތަކަށް މިފަދަ މަންޞަތަކުގެ މުހިންމުކަން ފާހަގަކުރައްވާފައެވެ. އަދި މިފަދަ މަންޞަތަކުގެ އެންމެ މުހިންމު ބޭނުމަކީ ހަމައެކަނި މަޢުލޫމާތު ބަދަލުކުރުން ނޫންކަމަށާއި، މި މަޢުލޫމާތުން މުވައްޒަފުންނަށާއި، މަސައްކަތަށާއި އަދި މާޙައުލަށްވެސް އެދެވޭ ބަދަލުތަކެއް އައުމަކީ މުހިންމުކަމެއް ކަމުގައި ވިދާޅުވިއެވެ.

އަދި ރާއްޖެއިން ބޭރަށް ކުރާ ތަމްރީނު ދަތުރުތަކުގައިވެސް ހިއްސާކުރަން އޮންނަނީ ހަމައެކަނި ތަމްރީނުތަކުގެ މަޢުލޫމާތު ނޫންކަމަށާއި، ފެންނަ ތަންތަނާއި ކަންކަމުން އަމިއްލަ ވެށްޓާއި މުޖުތަމަޢާ ގުޅުވައި، އޭގެ ސަބަބުން މަސައްކަތްތަކަށް ލިބިދާނެ ފަސޭހަތަކާއި ފައިދާތަކަށްވެސް ސަމާލުކަން ދޭންޖެހޭނެ ކަމަށް ވިދާޅުވިއެވެ.