12 ޓީމާއެކު ތިނަދޫ ސިޓީ ކައުންސިލް ފުޓްސަލް މުބާރާތް ފަށައިފި

ހަވަރު ސްޕޯޓްސްއިން އިންތިޒާމްކޮށްގެން މުޅި ހުވަދު އަތޮޅަށް ހުޅުވާލައިގެން ބާއްވާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގެ ކުޅުން މިރޭ ފަށައިފިއެވެ.

މުބާރާތް ފެއްޓުމުގެ ގޮތުން މިރޭ ތިނަދޫ ސިޓީ އާރު އަވަށު ފުޓްސަލަ ދަނޑުގައި ބޭއްވުނު ރަސްމިއްޔާތު ޝަރަފްވެރިކޮށްދެއްވީ ތިނަދޫ ސިޓީ މޭޔަރު ސައުދު އަލީ އެވެ. އަދި މިރަސްމިއްޔާތުގައި ތިނަދޫ ސިޓީގެ ޑެޕިއުޓީ މޭޔަރު ނަސްރުﷲ އަލީ އާއި ސިޓީ ކައުންސިލްގެ މެންބަރުނާއި ތިނަދޫ ސިޓީ ޑަބްލިޔުޑީސީގެ މެންބަރުން ވަނީ ބައިވެރިވެފައެވެ.

މިއަހަރުގެ މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގައި ބައިވެރިވެފައިވާ 12 ޓީމުގެ ތެރޭގައި ތިނަދޫ ސިޓީގެ އަށް ޓީމުގެ އިތުރުން ގދ. މަޑަވެލި، ގއ. ކޮނޑޭ އަދި ގއ. ވިލިގިލި މިއިން ކޮންމެ ރަށަކުން ވަނީ އެއްޓީމު ބައިވެރިވެފައެވެ. އަދި މުބާރާތުގައި ވާދަކުރާ އަނެއް ޓީމަކީ ހަވޮއްޑާ ރިސޯޓްގެ ފުޓްސަލް ޓީމެވެ.

މީގެ އިތުރުން މި މުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.