އަންނަ އަހަރުގެ ރޯދަ މަހަށް ރާއްޖޭގެ ކޮންމެ ގޭބިސީއަކަށް މަސްދަޅު ކޭހެއް ދެނީ

2025 ވަނަ އަހަރުގެ ރޯދަ މަހަށް ރާއްޖޭގެ ކޮންމެ ގޭބިސީއަކަށް މަސްދަޅު ކޭހެއް ދޭން ސަރުކާރުން ނިންމާފައިވާކަން ރައީސް ޑރ މުހައްމަދު މުއިއްޒު ހާމަކުރައްވައިފި އެވެ.

ރައީސް މުއިއްޒު މިކަން ހާމަކުރެއްވީ މިރޭ އެމަނިކުފާނުގެ ވެރިކަމަށް އެއް އެއް އަހަރު ފުރުން ފާހަގަކުރުމަށް މިރޭ މާލޭގެ ޒުވާނުންގެ މަރުކަޒުގައި ކުރިޔަށްދިޔަ ރައްޔިތުންނާއެކު ކުރިއަށް – ހަފްތާ 52 ފާހަގަކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

އެގޮތުން ރައީސް ވިދާޅުވީ ގޭބިސީތަކަށް މަސްދަޅު ކޭސް ދިނުމަށް ވާންޖެހޭ ތައްޔާރީތައްވުމަށް އެސްޓީއޯއަށް އަންގަވާފައިވާނެ ކަމަށެވެ. އެގޮތުން މިއީ މިއަހަރާއި ހިލާފަށް ކާޑުގެ ބަދަލުގައި އަންނަ އަހަރު ސަރުކާރުން ދޫކުރުމަށް ނިންމާފައިވާ ސަރުކާރުގެ ފަރާތުން ދެއްވާ ރޯދަ ހަދިޔާއެއް ކަމަށް ރައީސް ވިދާޅުވިއެވެ.

ވެރިކަމާއި ހަވާލުވެވަޑައިގެން މިދިޔަ ރޯދަ މަހު ރައީސް މުއިއްޒުގެ ސަރުކާރުން ވަނީ ކޮންމެ ގެއަކަށް ހަނޑު ބަސްތާއަކާއި ފުށް ބަސްތާއެއް އެސްޓީއޯ މެދުވެރިކޮށް ދީފަ އެވެ.

އެގޮތުން ސަރުކާރުން ހަދިޔާގެ ގޮތުގައި ކޮންމެ ގޭބިސީއަކަށް ދިނީ 10 ކިލޯ ފުށާއި 10 ކިލޯ ހަނޑުލެވެ. ކާޑުގެ ބާވަތްތައް ދޫކުރީ ޑޮމެސްޓިކް ކަރަންޓް މީޓަރުގެ ނަންބަރަށް ބެލުމަށްފަހު ބަލާ އަންނަ ފަރާތުގެ ދިވެހިރައްޔިތެއްކަން އަންގައިދޭ އައިޑީ ކާޑްނަންބަރު ނޯޓުކުރުމަށްފަހުއެވެ.