ދިވެހި ޒުވާނުންނަކީ ޤާނޫނަށް ބޯލަނބާ އުފެއްދުންތެރި ޒުވާނުންތަކެއް, ކުށުގެ ވެށީގައި އުޅެނީ ޒުވާނުންގެ ދެ އިންސައްތަ!

ޒުވާނުންގެ ތެރެއިން ކުށުގެ ޢަމަލުތަކުގައި ބައިވެރިވަނީ އެންމެ 2 އިންސައްތަ މީހުން ކަމަށް އެސިސްޓެންޓް ޕޮލިސް ކޮމިޝަނަރު އަދި ފުލުހުންގެ ތަރުޖަމާނު އަހުމަދު ޝިފާން ވިދާޅުވެއްޖެ އެވެ.

ޝިފާން މިފަދައިން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައި އެވެ.

އެގޮތުން ޝިފާން ވިދާޅުވީ ދިވެހި ޒުވާނުންނަކީ ޤާނޫނަށް ބޯލަނބާ އަދި އުފެއްދުންތެރި ޒުވާނުންކަމަށާއި ފަހުގެ ތަފާސްހިސާބުތަކުން ދައްކާގޮތުގައި އުމުރުން 15 އަހަރާއި 34 އަހަރާ ދެމެދުގެ ޒުވާނުންގެ ތެރެއިން ކުށުގެ ޢަމަލުތަކުގައި ބައިވެރިވަނީ އެންމެ 2 އިންސައްތަ މީހުންކަމަށެވެ.

އަދި ކަމާބެހޭ ފަރާތްތަކުން ގެންގުޅެމުންދާ ޕްރޮއެކްޓިވް، ޕާޓިސިޕޭޓިވް އެޕްރޯޗަކާއެކު، މިއަދަދު މިއަށްވުރެ ވެސް ކުޑަކުރެވިގެންދާނެ ކަމަށް ޝިފާން ފާހަގަކުރެއްވި އެވެ.

ޝިފާން މިފަދައިން ވިދާޅުވި އިރު ޒުވާނުން މުޖުތަމައުއަށް އަހުލުވެރިކޮށް ކުށްކުށަށް އަރައިގަތުން ހުއްޓުވުމަށް ބާރު އެޅުވުމުގެ ގޮތުން ދިވެހި ފުލުހުންގެ އިދާރާއާއި ޒުވާނުންނާ ބެހޭ ވުޒާރާ އާއި އެހެނިހެން ކަމާބެހޭ ފަރާތްތަކުން މިހާރުވެސް ރާއްޖޭގެ އެކި ކަންކޮޅުތަކުގައި ޒުވާނުންނަށް ހާއްސަ ޕްރޮގްރާމްތަކެއް ދަނީ ކުރިޔަށް ގެންދަމުންނެވެ.