އެމެރިކާއާއި އިނގިރޭސިވިލާތުން ޔަމަނަށް ބޮޑެތި ހަމަލާތަކެއްދީފި

އެމެރިކާއާއި އިނގިރޭސިވިލާތުން ޔަމަނުގެ ވެރިރަށަށް ވައިގެ ހަމަލާތަކެއް ދޭން ފަށައިފި އެވެ.

ޔަމަނުގެ އަލް މަސީރާ ޓީވީ އިން ރިޕޯޓުކުރާ ގޮތުގައި ވެރިރަށް ސަނާ ހިމެނޭ ގޮތަށް އެމެރިކާ އާއި އިނގިރޭސިވިލާތުން ޔަމަނަށް ވައިގެ ހަމަލާތައް ވަނީ ދޭން ފަށާފައި އެވެ.

އެމެރިކާގެ ދިފާއީ މައި އިދާރާ, ޕެންޓަގަން އިން ބުނެފައި ވަނީ ޔަމަނަށް ދެމުންދާ ހަމަލާތައް އަމާޒުކޮށްފައިވަނީ ހަތިޔާރު ރައްކާކުރާ އެޑްވާންސް ފެސިލިޓީތަކަށް ކަމަށެވެ.

އަލް މަސީރާ ޓީވީން ރިޕޯޓްކޮށްފައިވާ ގޮތުގައި ސަނާގެ ބައެއް ސަރަހައްދުތަކާއި އުތުރު އަމްރާން ގަވަރުނަރޭޓްގެ އިތުރުން އެހެނިހެން ސަރަހައްދުތަކަށް ރޭގަނޑު ވަނީ ގެއްލުންވެފަ އެވެ. މި ހަމަލާތަކުގައި އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް އަދި ލިބިފައެއް ނުވެއެވެ.

ޕެންޓަގަން އިން އޭއެފްޕީ ނިއުސް އެޖެންސީއަށް ދިން އިންޓަވިއުއެއްގައި ބުނީ އެ ހަމަލާ އަމާޒުކޮށްފައިވަނީ ރެޑް ސީ އާއި ގަލްފް އޮފް އެޑެންގެ އެކި ސަރަހައްދުތަކުގައި ބައިނަލްއަގްވާމީ ކަނޑުގެ ސަރަހައްދުން ދަތުރުކުރާ އަސްކަރީ އަދި މަދަނީ އުޅަނދުތަކަށް ހޫތީން ހަމަލާދިނުމަށް ބޭނުންކުރާ ހަތިޔާރުތައް ރައްކާކުރާ ފެސިލިޓީތަކަށް ކަމަށެވެ.

ހޫތީ ހަނގުރާމަވެރިން ރަތް ކަނޑުން ދަތުރުކުރާ އިސްރާއީލާ ގުޅުން ހުރި ވިޔަފާރީގެ އުޅަނދުތަކަށް ހަމަލާދިނުން ހުއްޓުވުމަށް މިދިޔަ ޖެނުއަރީ މަހުން ފެށިގެން ދެ ގައުމުން ވަނީ ޔަމަނަށް ތަކުރާރުކޮށް ހަމަލާތައް ދީފަ އެވެ. ހޫތީން ބުނީ މިދިޔަ ޖުލައި މަހު ހުދައިދާ ޕްރޮވިންސަށް ދިން ހަމަލާތަކުގައި 16 މީހުން މަރުވެފައިވާ ކަމަށެވެ.

ސަނާ ހިމެނޭ ގޮތަށް ޔަމަނުގެ ބޮޑު ސަރަހައްދެއް ކޮންޓްރޯލް ކުރާ ހޫތީން ދަނީ ފަލަސްތީނާ އެއްބައިވަންތަވުމުގެ ގޮތުން ރަތް ކަނޑުގެ ޝިޕިން ލޭންތަކަށް ހަމަލާދީ އިސްރާއީލަށް މިސައިލާއި ޑްރޯން ހަމަލާދެމުންނެވެ.