އުތުރާއި ދެކުނު ތަރައްޤީކުރަނީ އިންޓަރގްރޭޓަޑް ޑިވެލޮޕްމަންޓް ޒޯންތައް ގޮތުގައި, މެނިފެސްޓޯގައި ވެސް އޮތީ އެގޮތަށް - ރައީސް

ރާއްޖޭގެ އެންމެ އުތުރާއި ދެކުނުގެ އަތޮޅުތައް ތަރައްޤީކުރަން ހަމަޖެހިފައިވަނީ އިންޓަރގްރޭޓަޑް ޑިވެލޮޕްމަންޓް ޒޯންތައް ގޮތުގައި ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ ރާއްޖޭގައި އާބަން ސެންޓަރުތައް ޤާއިމްކުރާ 7 ސަރަހައްދުގެ ގޮތުގައި މިއަދު އިއުލާނުކުރި 7 ރަށުގެ ލިސްޓުގައި ބޮޑު ތިލަދުންމައްޗާއި ދެކުނުގެ ސަރަހައްދުތައް ހިމެނިފައި ނުވުމުން ކަމަށްބުނެ އިދިކޮޅުން ސަރުކާރުން ފާޑުކިޔަމުންދާ ދަނޑިވަޅެއްގައި މިއަދު އެކްސްގައި ކުރެއްވި ޕޯސްޓެއްގައި އެވެ.

އެގޮތުން ރައީސް ވިދާޅުވީ މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެމަނިކުފާނު ބަޔާންކޮށްފައިވާ ފަދައިން، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަން ގެ އިތުރުން އެންމެ މަތީ ފަންތީގެ ޚިދްމަތްތައް ހިމެނޭހެން، އެންމެ އުތުރުގެ 3 އަތޮޅު ހިމެނޭހެން ނޮރދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ 4 އަތޮޅު ހިމެނޭހެން ސަރދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުން އަދި އޭގެ އިތުރަށް 7 އަރބަން ސެންޓަރު (މާލެއިން އުތުރުން 3، މާލެއިން ދެކުނުން 4) ތަރައްޤީ ކުރުން އެއީ ސަރުކާރުގެ ސިޔާސަތު ކަމަށެވެ.

އަދި މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްޤީގެ މާސްޓަރޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ޤަސްދުކުރާ ކަންކަން ކަމަށް ރައީސް ވިދާޅުވިއެވެ.ރައީސް ވިދާޅުވީ ކަންކަމުގެ ހަގީގަތް ނުބައްލަވާ، ނުވަތަ ޙަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން ކަމަށެވެ.

ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން މިއަދު ވަނީ ރާއްޖޭގައި އާބަން ސެންޓަރުތައް ޤާއިމްކުރުމަށް ރައީސުލްޖުމްހޫރިއްޔާ ކަނޑައެޅުއްވި 7 ރަށް އިއުލާން ކޮށްފައެވެ. އެގޮތުން އެ 7 ރަށުގެ ތެރޭގައި ހިމެނެނީ ރ. އުނގޫފާރު , ބ. އޭދަފުށި , ޅ. ނައިފަރު, އދ. މަހިބަދޫ , ފ. ނިލަންދޫ , ދ. ކުޑަހުވަދޫ އަދި ލ. ފޮނަދޫ އެވެ.

މި ލިސްޓު އާންމުކުރުމާއި އެކު އިދިކޮޅުން ސަރުކާރުން ފާޑުކިޔަމުންދާއިރު ރިޔާސީ ކެމްޕެއިނުއްސުރެ ރައީސް ނިންމަވާފައިވަނީ ރާއްޖޭގެ އެންމެ އުތުރުގެ 4 އަތޮޅަކީ ޑިވެލޮޕްމަންޓު ޒޯނެއްގެ ގޮތުގައި އަދި އެންމެ ދެކުނުގެ 4 އަތޮޅުވެސް ޑިވެލޮޕްމަންޓް ޒޯނެއްގެ ގޮތުގައި ތަރައްޤީކުރުމަށް ކަމަށް އެމަނިކުފާނު ވަނީ އިއުލާނުކުރައްވާފައި އެވެ.