ޔޫތު އަތުން ސޯލްޓީޒްއަށް ތަފާތުބޮޑު މޮޅެއް

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ ފިރިހެން ދެވަނަ ޑިވިޝަން ގުރޫޕް ހަތަރެއްގައި ސޯލްޓީޒް އާއި ޔޫތު ވާދަކުރި މެޗު ފަސޭހަކަމާއެކު 28-10 ގެ ނަތީޖާއަކުން ސޯލްޓީޒް ކާމިޔާބުކޮށްފިއެވެ.

މެޗުގެ ފުރަތަމަ ހާފުގައި މޮޅަށް ކުޅެ ސޯލްޓީޒް އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ އަށް ލަނޑުގެ ލީޑަކާއެކު 12-4 ގެ ނަތީޖާއަކުން ސޯލްޓީޒް ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު 16 ލަނޑު ކާމިޔާބުކުރިއިރު, މިހާފުގައި ޔޫތު އަށް ކާމިޔާބުކުރެވުނީ އެންމެ ހަ ލަނޑެވެ.

އެގޮތުން މިމެޗުގައި ސޯލްޓީޒްގެ މުހައްމަދު އަލްހާން ފައިސަލް ފަސް ލަނޑު ކާމިޔާބުކުރިއިރު, އެޓީމުގެ މުހައްމަދު ދާނިޝް, ހުސައިން އަމަން އަލީ މިއިން ކޮންމެ ކުޅުންތެރިޔަކުވަނީ ހަތަރު ލަނޑު ކާމިޔާބުކޮށްފައެވެ. އަދި މީގެއިތުރުން އެޓީމުގެ އިބްރާހިމް ރައްޔާން ބިން ނަލީމް މުހައްމަދު, އިސްމައިލް ޝަރީފް, މުހައްމަދު އަފްލާހު ހުސައިން ޝިފާޒް މިއިން ކޮންމެ ކުޅުންތެރިޔަކު ތިން ލަނޑު ކާމިޔާބުކޮށްދިންއިރު, ޔޫސުފް މައީޝް މުސްތަފާ ވަނީ ދެ ލަނޑު ކާމިޔާބުކޮށްދީފައެވެ. އަދި އިބްރާހިމް އަޔާން ތަންޒީމް, އިބްރާހިމް ސޯލިހު, ޔުއާން ނާފިއު, ޔޫނުސް ވާޒިން މުހައްމަދު ވިސާމް މިއިން ކޮންމެ ކުޅުންތެރިޔަކު ވަނީ އެއް ލަނޑު ކާމިޔާބުކޮށްފައެވެ.

މީގެ އިތުރުން ޔޫތުގެ މުހައްމަދު ޒީހާން ތިން ލަނޑު ކާމިޔާބުކޮށްދިންއިރު, އަހުމަދު މުއުމިން މުހައިމިން ރަޔާން މުހައްމަދު އިބްރާހިމް މިއިން ކޮށްމެ ކުޅުންތެރިޔަކުވަނީ ދެ ލަނޑު ކާމިޔާބުކޮށްދީފައެވެ. އަދި މީގެ އިތުރުން ޔޫސުފް ނައުހާން ނާޖިހު, އަބްދުލް މާނިއު ނާސިރު, ނަޒްހާން އަހުމަދު މިއިން ކޮންމެ ކުޅުންްތެރިޔަކު ވަނީ އެއް ލަނޑު ކާމިޔާބުކޮށްދީފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ސޯލްޓީޒްގެ މުހައްމަދު ދާނިޝް އެވެ.

މިއަހަރުގެ މުބާރާތުގެ ފިރިހެން ދެވަނަ ޑިވިޝަނުގައި 16ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 16ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.