ލަންކާގެ ރިޔާސީ އިންތިހާބު މާދަމާ, ސިޔާސީ ހަލަބޮލިކަމަކަށް ފަހު އަމާން އައްސޭރިއަކަށް ދިޔުމުގެ މަގު!

2022 ވަނަ އަހަރު ސްރީލަންކާގައި ކުރިމަތިވި އިޤްތިޞާދީ ހީނަރުކަމާއި ސިޔާސީ ހަލަބޮލިކަމަށްފަހު ބާއްވާ ފުރަތަމަ އިންތިޚާބުގައި ލަންކާގެ 10 ވަނަ ރައީސަކު ހޮވުމަށް ހޮނިހިރު ދުވަހު ސްރީލަންކާގެ ރައްޔިތުން ވޯޓު އަޅާނެ އެވެ.

ކާބޯތަކެއްޗާއި ތެލުގެ ދަތިކަމުގެ ސަބަބުން ސިޔާސީ ހަލަބޮލިކަމަކަށް ގައުމު ވެއްޓި އޭރުގެ ރައީސް ގޯޓާބަޔަ ރާޖަޕަކްސަ އަށް 2022 ވަނަ އަހަރުގެ ޖުލައި މަހު ގައުމުން ފިލަން ޖެހުނެވެ. މިއާއި އެކު މާދަމާގެ އިންތިހާބު ވެގެންދާނީ މި ހަލަބޮލިކަމުން އަރައިގަތުމަށް ރައްޔިތުންގެ ރައީސަކު އިންތިހާބު ކުރާނެ ފަހަރަށެވެ.

ގޯޓާބަޔާގެ ހަމަނުޖެހުންބޮޑު ވެރިކަމަށްފަހު ގައުމުގެ ހުންގާނާއި އެވަގުތު ހަވާލުވީ މީގެ ކުރިންވެސް އެގައުމުގެ ރައީސް ކަމާއި ބޮޑުވަޒީރުކަން ކުރެއްވި ރަނިލް ވިކްރަމްސިންހައެވެ. މާދަމާގެ ވޯޓުގައި އޭނާވެސް އިންތިހާބީ ރައީސަކަށް ބަދަލުވުމުގެ އުންމީދުގައި ވާދަކުރައްވައެވެ.

ހޮނިހިރު ދުވަހުގެ ހެނދުނު އެގައުމުގެ ގަޑިން7:00 ގައި 13،134 ވޯޓުލާ މަރުކަޒުގައި ވޯޓުލުން ފަށާނެ އެވެ. ވޯޓުލުން ނިމޭނީ ހަވީރު 4:30 ގައެވެ. ވޯޓު ގުނަން ފަށާނީ މާދަމާ ރޭގެ 9:30 ގަ އެވެ.

ސްރީލަންކާގެ 22 މިލިއަން މީހުންގެ އާބާދީގެ ތެރެއިން ގާތްގަނޑަކަށް 17 މިލިއަން މީހުންނަށް ވޯޓުލުމުގެ ހައްގު ލިބިގެންވެއެވެ. އެގައުމުގެ އިލެކްޝަންސް ކޮމިޝަނުގައި ރަޖިސްޓްރީވެފައިވާ އުމުރުން 18 އަހަރު ން މަތީގެ ސްރީލަންކާގެ ކޮންމެ ރައްޔިތަކަށް ވޯޓުލެވޭނެ އެވެ.

ލަންކާގެ ރައީސް ކަމުގެ މަގާމަށް 38 ބޭފުޅަކު ވާދަކުރައްވަ އެވެ. ކެންޑިޑޭޓުންގެ އަދަދު އެންމެ ފުރަތަމަ 39 ގައި އޮތް އިރު، އެއް ކެނޑިޑޭޓް، އަމިއްލަ ކެންޑިޑޭޓް އިދުރޫސް މުހައްމަދު އިލްޔާސް ވަނީ މިދިޔަ އޮގަސްޓް މަހު ހާޓް އެޓޭކެއް ޖެހިގެން މަރުވެފަ އެވެ.

މި އިންތިހާބުގައި ގިނަ އަދަދެއްގެ ކެނޑިޑެޓުން ވާދަކުރި ނަމަވެސް އިންތިހާބުގައި ބޮޑު ނަތީޖާއެއް ހޯދާނެ ކަމަށް ބެލެވެނީ ޖުމުލަ 4 ކެނޑިޑޭޓެކެވެ. އެއީ މިހާރުގެ ރައީސް ރަނިލް އާއި ކުރީގެ ރައީސް މަހިންދަ ރާޖަޕަކްސަގެ ދަރިކަލުން ނިމާލް ރާޖަޕަކްސައާއި މާކްސިސްޓް ޕާޓީ ޖަނަތާ ވިމުކްތީ ޕެރަމުނާ (ޖޭވީޕީ) އަށް ނިސްބަތްވާ އަނޫރާ ކުމާރާ ޑިސަނަޔަކަ އާއި ޕޮޕިއުލިސްޓް ސަމާގީ ޖަނާ ބަލަވެގަޔާ (އެސްޖޭބީ)ގެ ސަޖިތު ޕްރޭމަދާސާ އެވެ.

މި ކެނޑިޑޭޓުންގެ ތެރެއިންވެސް ޕޯލްތަކުން ދައްކާ ގޮތުގައި އެންމެ ކުރީގައި ހުންނާނީ ޑިސަނަޔަކަ އެވެ. އަދި ދެވަނައިގައި ސަޖިތު ވާދަކުރާނެ ކަމަށް ބެލެވޭއިރު ރަނިލް ވާދަކުރާނީ ތިންވަނައިގައި ކަމަށް ބައެއް ޕޯލްތައް ދައްކައެވެ.