އައިޔޫއެމްގެ އައިސީއައިއޭ ކޮންފެރެންސްގައި ޕްރޮފެސަރ ފިލިޕް ހަލިންގަރ ބައިވެރިވާނެ!

ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) އިން ބާއްވާ އިންޓަރނޭޝަނަލް އިންޓެލެކްޓުއަލް އެޑްވާންސްމަންޓްސް (އައިސީއައިއޭ)ގެ ކީނޯޓް ސްޕީކަރއެއްގެ ގޮތުގައި ޕްރޮފެސަރ ފިލިޕް ހަލިންގަރ ބައިވެރިވާނެ ކަމަށް އެޔުނިވާސިޓީން ބުނެފި އެވެ.

މި ސެޕްޓެމްބަރ މަހުގެ 28 އަދި 29 ވަނަ ދުވަހު ބޭއްވުމަށް ހަމަޖެހިފައިވާ މި ކޮންފެރެންސްއަކީ ކޮންމެ އަހަރަކުވެސް އައިޔޫއެމްގައި ބާއްވާ ކޮންފެރެންސްއެކެވެ.

ޕްރޮފެސަރ ފިލިޕް ހަލިންގަރއަކީ މެނޭޖްމަންޓް އެޓް މަހިޑޯލް ޔުނިވާސިޓީގައި ގްލޯބަލް ޓެލެންޓް ޕްރޮފެސަރގެ ގޮތުގައި މަސައްކަތް ކުރައްވައި، 2017 ވަނަ އަހަރު ސަސްޓެއިނަބަލް ލީޑަރޝިޕްގެ ދަށުން ޗެއަރ ޕްރޮފެސަރޝިޕް ހާޞިލުކޮށް، ސަސްޓެއިނަބަލް ލީޑަރޝިޕްގެ ދަށުން ފީއެޗްޑީ ހާޞީލްކުރުމުގެ އިތުރުން 30 އަހަރު ތެރޭގައި، 20،000އަށް ވުރެ ގިނަ ސްކޫލް ލީޑަރސް ތަމްރީންކޮއްދެއްވާފައިވާ ބޭފުޅެކެވެ.

މި ކޮންފެރެންސްގައި، ޕްރޮފެސަރ ފިލިޕް ހަލިންގަރގެ ފަރާތުން، މަތީ ތަޢުލީމުގެ ދާއިރާގައި ދެމެހެއްޓެނިވި ތަރައްޤީ ހޯދުމަށް ކުރަންޖެހޭ މަސައްކަތްތަކާއި، މި މަސައްކަތްތަކުގެ ތެރޭގައި ދިމާވާ ގޮންޖެހުންތަކުގެ އިތުރުން އެ ގޮންޖެހުންތަކުން އަރައިގަތުމަށް އެޅެން ހުރި ފިޔަވަޅުތަކާއި ގުޅޭގޮތުން މަޢުލުމާތު ޙިއްސާކުރައްވާނެއެވެ.