މުބާރާތްތަކުގައި ނަމެއްގައި ބައިވެރިވުން ނިމުމަކަށް ގެނެވިއްޖެ، މިހާރު އަބަދުވެސް ޓީމްތަކުގެ އަމާޒަކީ ވަނަ ހޯދުން - ރާފިއު

މުބާރާތްތަކުގައި ނަމެއްގައި ބައިވެރިވާން ދާ ދިޔުން މިހާރު ނިމުމަކަށް ގެނެވިއްޖެކަމަށާއި، މިހާރު ހުރިހާ ކުޅިވަރަކުންވެސް މުބާރާތްތަކުގައި ވާދަކުރަނީ ވަނަ ހޯދަންކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ގައުމީ އަންހެން ވޮލީބޯޅަ ޓީމްގެ ކުޅުންތެރިންނަށް ޖާޒީ ހަވާލްކުރުމަށް އޮތް ރަސްމިއްޔާތުގައި ވާހަކަދައްކަވަމުން ވަޒީރު ރާފިޢު ވިދާޅުވީ ދިވެހިރާއްޖޭގެ ކުޅިވަރުތަކުން މީގެ ކުރީގައި މީގެ ކުރިން ބައިނަލްއަގްވާމީ މުބާރާތްތަކުގައި ވާދަކުރަނީ ހަމަ ނަމެއްގައި ބައިވެރިވެލާ އުސޫލުންކަމަށެވެ.

ނަމަވެސް މިހާރު އެކަން ބަދަލުވެއްޖެކަމަށާއި، މިހާރު އެންމެންވެސް ބައިވެރިވަނީ ވަނަ ހޯދަން ކަމަށް އޭނާ ވިދާޅުވި އެވެ.

ގައުމީ ޓީމްގެ ކުޅުންތެރިންނަށް ހިތްވަރު ދެއްވައި ވަޒީރު ރާފިޢު ވިދާޅުވީ ކޮންމެ ކަމެއްގައިވެސް އަބަދުވެސް އަމާޒަކަށް ހަދަންވީ ކާމިޔާބީ ހޯދުމަށްކަމަށެވެ. ކުރިން ވާދަކުރި މުބާރާތަށްވުރެ ރަނގަޅަށް ޕާފޯމްކޮށް، އެއަށްވުރެ ބޮޑު ކާމިޔާބީއެއް ހޯދަން މަސައްކަތްކުރުމުގެ މުހިންމުކަން ވަޒީރު ފާހަގަކުރެއްވި އެވެ.

ވަޒީރު ވިދާޅުވީ ޓީމްގެ ތެރޭގައި އޮންނަ ގުޅުމާއި، އޮފިޝަލުންގެ މެދުގައި ޓިމާ ދޭތެރޭ އޮންނަ ގުޅުމަކީވެސް ކާމިޔާބު ހޯދަން ބަލާއިރު މުހިންމު އެއްޗެއްކަމަށެވެ. މީގެ އިތުރުން އެސޯސިއޭޝަނާ ދެމެދުވެސް އޮންނަ ގުޅުންވެސް އެއް މުބާރާތުން އަނެއް މުބާރާތަށް ބަދަހިވާން ޖެހޭކަމަށް ވަޒީރު ވިދާޅުވި އެވެ.

ގައުމީ އަންހެން ވޮލީބޯޅަ ޓީމް މިހާރު ތައްޔާރުވަމުންދަނީ މާދަމާ ފަށާ ކާވާ ވޮލީބޯޅަ ޗެލެންޖަށެވެ. މި މުބާރާތުގައި ސެންޓްރަލް އޭޝިއާގެ ހަތަރު ގައުމަކުން ވާދަކުރެ އެވެ. އެއީ ކިރިގިސްތާން، އަފްގާނިސްތާން އަދި ތަޖިކިސްތާން އެވެ.