ރާއްޖެއިން ފަލަސްތީނަށް 1.29 މިލިއަން ޑޮލަރުގެ އެހީއެއް ދެނީ

ރާއްޖެއިން ފަލަސްތީނަށް 1.29 މިލިއަން އެމެރިކާ ޑޮލަރަށްވުރެ ގިނަ ޑޮލަރުގެ އެހީއެއް ދޭން ނިންމައިފި އެވެ.

ދިވެހި ސަރުކާރުގެ ފަރާތުން މިކަން ރަސްމީކޮށް ހާމަކުރެއްވީ އދ.ގެ މައި މަރުކަޒުގައި އިއްޔެ ބޭއްވި ޔޫ.އެން.އާރް.ޑަބްލިއު.އޭ ޕްލެޖިންގ ކޮންފަރެންސްގައި ރާއްޖެއިން އދއަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ.ޢަލީ ނަޞީރު މުޙައްމަދު އެވެ.

ދިވެހި ސަރުކާރުން ބުނީ ޔުނައިޓެޑް ނޭޝަންސް ރިލީފް ވޯކްސް އެޖެންސީ ފޮރ ފަލަސްތީން ރެފިއުޖީސް އިން ދަ ނިއަރ އީސްޓް (ޔޫ.އެން.އާރް.ޑަބްލިއު.އޭ) މެދުވެރިކޮށް ރާއްޖެއިން ފަލަސްޠީނަށް 1.29 މިލިއަން އެމެރިކާ ޑޮލަރަށްވުރެ ގިނަ ޑޮލަރުގެ އެހީއެއް ދޭން ނިންމާފައިވާ ކަމަށެވެ. ސަފީރު ޢަލީ ނަޞީރުގެ ބަޔާނުގައި ވިދާޅުވީ ޔޫއެންއާރުޑަބްލިއުއޭއަށް ދިވެހި ސަރުކާރުން ދޭ އަހަރީ ކޮންޓްރިބިއުޝަން 5،000 ޑޮލަރުން 50،000 ޑޮލަރަށް އިތުރުކުރުމަށްވެސް ސަރުކާރުން ވަނީ ނިންމާފައި އެވެ.

ސަފީރު ޢަލީ ނަޞީރު ވިދާޅުވީ، ރައީސުލްޖުމްހޫރިއްޔާ ޑޮކްޓަރ މުޢިއްޒުގެ އިރުޝާދުގެ ދަށުން ފަލަސްޠީނަށް އެއްބައިވަންތަކަން ދައްކުވައިދިނުމުގެ ގޮތުން ޓެލެތޯނެއް ބާއްވައި، އެ ޓެލެތޯން މެދުވެރިކޮށް 18.4 މިލިއަން ދިވެހި ރުފިޔާއާއި، 49،800 އެމެރިކާ ޑޮލަރު ހޯދައި، ޔޫ.އެން.އާރު.ޑަބްލިއު.އޭ މެދުވެރިކޮށް ފަލަސްޠީނުގެ ރައްޔިތުންނަށް ހަދިޔާކުރުމަށް ހަމަޖެހިފައިވާ ކަމަށެވެ.

ސަފީރު ޢަލީ ނަޞީރު ދެއްކެވި ވާހަކަފުޅުގައި، ފަލަސްޠީނުގެ ރައްޔިތުންނަށް މުހިންމު ޚިދުމަތްތަކާއި، ކުއްލި އެހީތެރިކަން ފޯރުކޮށްދިނުމުގައި ޔޫ.އެން.އާރް.ޑަބްލިއު.އޭއިން އަދާކުރާ މުހިންމު ދައުރެއް ފާހަގަކުރެއްވިއެވެ. އަދި ބައިނަލްއަގްވާމީ މުޖުތަމައުން ޔޫއެންއާރްޑަބްލިއުއޭއަށް އަދާކުރަންޖެހޭ މާލީ އަދި ސިޔާސީ ޒިންމާތައް އަދާކުރުމަށް އޭނާ ގޮވާލެއްވިއެވެ.