ފިޔޯރީން ގެއްލުނު ކުއްޖާ އިތުރު ޓެސްޓުތަކެއް ހެދުމަށް ތިނަދޫއަށް!

ގދ. ފިޔޯރީ އިން އިއްޔެ ގެއްލިގެން ހޯދަމުން ދަނިކޮށް ފެނުނު ކުއްޖާގެ އިތުރު ޓެސްޓުތަކެއް ހެދުމަށް ތިނަދޫއަށް ގެންގޮސްފައިވާ ކަމަށް ފުލުހުން ބުނެފި އެވެ.

ފުލުހުން ބުނީ, އެކުއްޖާގެ ހާލު ރަނގަޅުކަމަށް ފިޔޯރީ ހެލްތު ސެންޓަރުން ފުލުހުންނަށް މައުލޫމާތުދީފައިވާ ކަމަށެވެ. އެހެން ނަމަވެސް ކުޑަކުއްޖަކު ނުފެނި ގިނައިރުވުމުން ކުއްޖާގެ ހާލަތު އިތުރަށް ދެނެގަތުމަށް ބައެއް ޓެސްޓުތައް ހެދުމަށް ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލަށް ގެންގޮސްފައިވާ ކަމަށް ފުލުހުން ވަނީ ބުނެފައެވެ.

އިއްޔެ ހަވީރުން ފެށިގެން ގެއްލިގެން ހޯދަމުން ދިޔައީ އެރަށު ފިނިވިލާގެ މަރިޔަމް މީނާލް މުޙައްމަދު އެވެ. ފުލުހުން ބުނީ ރޭ 7:08 ހާއިރު ގދ ފިޔޯރީއިން މީނަލް މުހައްމަދު ނަމަކަށް ކިޔާކުއްޖަކު ގެއްލިގެން ރިޕޯޓުކޮށްފައިވާ ކަމަށާއި ކުއްޖާ އެންމެ ފަހުން ފެނިފައިވަނީ އިއްޔެ ހަވީރު 5:00 ހާއިރު އެ ކުއްޖާ ދިރިއުޅޭ ގެއިން ކަމަށް އާއިލާ އިން މައުލޫމާތު ދީފައިވާ ކަމަށެވެ.

އެކުއްޖާ އިއްޔެ ފެނިފައިވަނީ, ރޭ 11:00 އާއި 00:00 އާ ދޭތެރޭ ވަގުތެއްގައެވެ. އެކުއްޖާ ފެނިފައިވަނީ އެރަށު ސަހަރާ ކައިރީ ހުންނަ ގެއަކުން ކަމަށްވެސް ގާފު ނޫހަށް ވަނީ މައުލޫމާތު ލިބިފައެވެ.

މި ހާދިސާއާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ވަނީ ބުނެފައެވެ.