ވަޒީރު ޒަމީރު ޤަތަރުގެ ބޮޑު ވަޒީރާ ބައްދަލުކުރައްވައިފި

ރާއްޖޭގެ ޚަރިޖީ ވަޒީރު މޫސާ ޒަމީރު، ޤަތަރުގެ ބޮޑު ވަޒީރު ޝެއިހް މުހައްމަދު ބިން އަބްދުއްރަހްމާން އަލް ތާނީއާ ބައްދަލުކުރައްވައިފިއެވެ.

ޚާރިޖީ ވަޒީރު، ޤަތަރުގެ ބޮޑު ވަޒީރާ ބައްދަލުކުރެއްވީ ވަޒީރު ޤަތަރަށް ކުރައްވާ ދަތުރުފުޅުގައި މިއަދުއެވެ.

އެ ބައްދަލުކުރެއްވުމުގައި ވަޒީރު ޒަމީރު ދެއްކެވި ވާހަކަފުޅުގައި، ދިވެހިރާއްޖެއާއި ޤަތަރުގެ ދެމެދުގައި އޮތް ގާތް ގުޅުމުގެ މައްޗަށް އަލިއަޅުއްވާލައްވައި، އިޖްތިމާޢީ އަދި އިޤްތިޞާދީ ކުރިއެރުމަށް ޤަތަރުން ރާއްޖެއަށް ވަމުންދާ ދީލަތި އެހީތެރިކަމަށް ޝުކުރު އަދާކުރެއްވިއެވެ.

މި ބައްދަލުކުރެއްވުމުގައި ދެވަޒީރުން ވަނީ ދެޤައުމުގެ ގުޅުން އިތުރަށް ބަދަހިކުރައްވާނެކަމުގެ ޔަޤީންކަން ދެއްވާފައެވެ.

މީގެ އިތުރުން ވަޒީރު ވަނީ ނިރުބަވެރި އިސްރާއީލުން ޣައްޒާއަށް ދެމުންދާ ޙަމަލާތައް ހުއްޓާލުމުގެ މަރުހަލާގައި ގަތަރުން އަދާކުރާ ދައުރަށް ޝުކުރު އަދާކުރައްވާފައެވެ. މި ބައްދަލުކުރެއްވުމުގައި ދެވަޒީރުން ދެއްކެވި ވާހަކަފުޅުގައި، ބައިނަލްއަޤްވާމީ ގޮތުން ކަންބޮޑުވާ ކަންކަމުގައި އެއް އަމާޒަކަށް ވާސިލްވުމުގައި ރާއްޖެއާއި ޤަތަރާ ދެމެދު އޮންނަ ގުޅުން އިތުރަށް ބަދަހި ކުރައްވާނެ ކަމުގެ ޔަގީންކަން ދެއްވާފައިވެއެވެ.

ވަޒީރުގެ މި ބައްދަލުކުރެއްވުމުގައި ޚާރިޖީ ވުޒާރާގެ ބައިލޭޓަރަލް ސެކްރެޓަރީ ޑރ. ހާލާ ޙަމީދާއި، އެމްބެސަޑާ އެޓް ލާޖް ޑރ. ފަޒީލް ނަޖީބުގެ އިތުރުން އެސިސްޓެންޑް ޑިރެކްޓަރު ލަމްހާ ސަލީމް ބައިވެރިވެވަޑައިގެންނެވިއެވެ.