ޖިނާޢީ ކުށުގެ ޒިންމާ ނަގަންޖެހޭ އުމުރު 12 އަހަރަށް ބަދަލުކުރަނީ

ޖިނާޢީ ކުށުގެ ޒިންމާ ނަގަންޖެހޭ އުމުރު 12 އަހަރަށް ތިރިކުރުމަށް ގާނޫނަށް ގެންނަން ޖެހޭ ބަދަލު ގެނައުމުގެ މަސައްކަތް ފަށާފައިވާ ކަމަށް ދާހިލީ ވަޒީރު އަލީ އިހްސާން ވިދާޅުވެއްޖެ އެވެ.

ދާހިލީ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވަޒީރު އިހްސާން ވިދާޅުވީ, ކުޑަކުދިންގެ އަދުލުގެ ނިޒާމު ފުރިހަމަ ކުރުމަށްޓަކައި ޖިނާޢީ ކުށުގެ ޒިންމާ ނަގަންޖެހޭ އުމުރު 12 އަހަރަށް ތިރިކުރުމަށް ގެންނަން ޖެހޭ ޤާނޫނީ ބަދަލު ގެނައުމުގެ މަސައްކަތް މިހާރު ކުރަމުން އަންނަ ކަމަށެވެ.

އިހުސާން ވިދާޅުވީ, މިގޮތަށް ބަދަލުކުރުމުގެ ބޭނުމަކީ ކުޑަކުދިން ޖަލަށްލައި ގެންގުޅުމެއް ނޫން ކަމަށާއި, މީގެ ބޭނުމަކީ 12 އަހަރުން ފެށިގެން ކުށުގެ ވެއްޓަށް ހުށަހެޅިދާނެކަމަށް ފެންނަކުދިންނާއި, ކުށުގެ ދައުވާ ކުރެވޭ ކުދިން ރިހިބިލިޓޭޓްކޮށް, މުޖުތަމައުއަށް ފައިދާހުރި ބޭނުންހުރި ކުދިންތަކެއްގޮތުގައި އަނބުރާ މުޖުތަމައުއަށް ގެނައުމަށް ކުރެވޭ މަސައްކަތަށް ގާނޫނީ ބާރު ހޯދުމަށް ކުރެވޭ ކަމެއް ކަމަށެވެ.

ވަޒީރު ވިދާޅުވީ, މިގޮތަށް ގާނޫނު ބަދަލުކުރެވުމުން 12 އަހަރުގެ ކުދިންނަށްވެސް ރިހިބިލިޓޭޓް ޕްރޮގްރާމް ހިންގުމުގެ ފުރުސަތު ގާނޫނީގޮތުން ލިބިގެން ދާނެ ކަމަށެވެ.

ޖިނާއީ ކުށުގެ ޒިންމާ ނަގަންޖެހޭ ކަމަށް ގާނޫނުގައި ބަޔާން ކުރަނީ 15 އަހަރެވެ. ނަމަވެސް ޖުވެނަލް ޖަސްޓިސް ޑިޕާޓްމެންޓްގެ ރެކޯޑް ދައްކާގޮތުން ރާއްޖޭގައި މިވަގުތު 12 އަހަރާއި 13 އަހަރާއި ދެމެދުގެ އެތައް ކުދިންނެއް މިފަދަ މާހައުލުގައި އެޓްރިސްކުގައި އުޅެއެވެ. އެފަދަ ކުދިންނަށް ރިހިބިލޭޓޭޓްކޮށް އަނބުރާ މުޖުތަމައުއަށް ނެރުމަށް މަސައްކަތް ކުރައްވާނެ ކަމަށް ދާހިލީ ވުޒާރާއިން ވަނީ މީގެ ކުރިންވެސް ބުނެފައެވެ.