50 މިލިއަނުން މަތީގެ ބޮޑެތި މަޝްރޫޢުތައް ޖޫން މަހު ފަށާނަން - ރައީސް

ރާއްޖޭގެ އެކި ސަރަހައްދުތަކުގައި މި ސަރުކާރުން ހިންގަން ނިންމާފައިވާ 50 މިލިއަން ރުފިޔާއަށްވުރެ ބޮޑެތި މަޝްރޫޢުތައް ޖޫން މަހު ފެށޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މުއިއްޒު މިހެން ވިދާޅުވީ, ހައްދުންމަތީގެ ރަށްތަކަށް މިހާރު ކުރައްވަމުން އަންނަ ރަސްމީ ދަތުރުފުޅުގައި ލ. މާވަށަށް ވަޑައިގެން އެރަށު ރައްޔިތުންނާއެކު ބޭއްވެވި ބައްދަލުކުރެއްވުމުގައެވެ.

މި ބައްދަލުކުރެއްވުމުގައި ރައީސް ވިދާޅުވީ, މާވަށުގައިވެސް ތަރައްގީގެ މުހިންމު މަޝްރޫއުތަަކެއް ކުރިއަށް ގެންދިޔުމަށް ނިންމާފައިވާ ކަމަށެވެ. މިއަހަރުގެ ބަޖެޓުގައި ބައެއް މަޝްރޫއުތައް ހިމެނިފައިވާކަން ފާހަގަކުރައްވައި ރައީސް ވިދާޅުވީ, މިއަހަރުގެ ބަޖެޓަކީ ކުރީގެ ސަރުކާރުން ފާސްކުރި ބަޖެޓެއްކަމުން މިސަރުކާރުން ކުރިއަށް ގެންދަން ބޭނުންވާ ހުރިހާ މަޝްރޫއެއް ބަޖެޓުގައި ހިމެނިފައިނުވާ ކަމަށެވެ.

ރައީސް ވިދާޅުވީ، 50 މިލިއަން ރުފިޔާއިން މަތީގެ ގިނަ މަޝްރޫޢުތައް ޖޫން މަހުގެ ތެރޭގައި ފެށުމަށް މަސައްކަތްކުރައްވާކަމަށެވެ. އޭގެ ތެރޭގައި ބިން ހިއްކުމާއި ބަނދަރު ހެދުންފަދަ ބޮޑެތި މަޝްރޫއުތައް ހިމެނޭކަމަށް ރައީސް ފާހަގަކުރެއްވި އެވެ. ބާކީހުރި ގިނަ މަޝްރޫޢުތައް އަހަރުގެ ބާކީ ބައިގައި ކުރިއަށްގެންދަވާނެކަމަށް ރައީސް ވިދާޅުވި އެވެ.