ރައްކާތެރިކަން ކަށަވަރުކުރެވެންދެން އަލިފާނުގެ ހާދިސާ ހިނގި ކެނެރީ މަގު ބަންދުކޮށްފި

ރައްކާތެރިކަން ކަށަވަރުކުރެވެންދެން މިރޭ މާލޭގައި އަލިފާނުގެ ހާދިސާ ހިނގި ކެނެރީ މަގު ބަންދުކޮށްފި އެވެ.

ފުލުހުން މިރޭ އެކްސްގައި ކުރި ޕޯސްޓެއްގައި ބުނެފައިވަނީ މ. ރަބީއުވިލާ ގައި މިރޭ ހިނގި އަލިފާނުގެ ހާދިސާ ގައި އެ ގެއަށް ލިބިފައިވާ ގެއްލުމުގެ ފުރިހަމަ އިންސްޕެކްޝަނެއް ހަދައި ރައްކާތެރިކަން ކަށަވަރު ކުރެވެންދެން އެމަގު ވަނީ އާންމު ދަތުރު ފަތުރަށާއި އެ މަގުގެ ގެތަކުގައި ދިރިއުޅޭ މީހުން ފިޔަވައި ހިނގާ ބިނގާވެ އުޅޭ މީހުންނަށް ބަންދުކޮށްފައިވާ ކަމަށެވެ.

އަދި އެ މަގުގެ ގެ ތަކުގައި ދިރިއުޅޭ މީހުންވެސް އެ މަގުގައި ހިނގާ ބިނގާވެ އުޅޭ އިރު އެ ސަރަހައްދުގައި ހަރަކާތްތެރިވާ ފުލުހުންގެ އިރުޝާދުތަކާ އެއްގޮތަށް އަމަލު ކުރެއްވުމަށް ފުލުހުން ވަނީ އެދިފައި އެވެ.

މިރޭ އަލިފާނުގެ ހާދިސާ ހިނގީ ކެނެރީމަގުގައި ހުންނަ މ. ރަބީއުވިލާ ގެ 4 ވަނަ ފަންގިފިލާގައި އެވެ. އަދި އަލިފާނުގެ އަސަރު އެގޭގެ އެހެން ފަންގިފިލާތަކަށްވެސް ކޮށްފައިވާ ކަމަށް މައުލޫމާތު ލިބެއެވެ. އެގޭގެ ވެރިފަރާތާއި ހަވާލާދީ ބައެއް ނޫސްތަކުން ރިޕޯޓްކޮށްފައިވާ ގޮތުގައި އެގެއަކީ މީހުން ދިރިނޫޅޭ ގެއެކެވެ.

މި ހާދިސާގެ މައުލޫމާތު އެމްއެންޑީއެފްއަށް ލިބިފައިވަނީ މިރޭގެ 20:19 ގައި އެވެ. އެއާއިއެކު ސިފައިންގެ ފަޔާ އެންޑް ރެސްކިއު ސާވިސްއިން ވަނީ އެސަރަހައްދުގައި ހަރަކާތްތެރިވެ އަލިފާންގަނޑު މިހާރު ވަނީ ކޮންޓްރޯލްކޮށް އެއްކޮށް ނިއްވާލާފައި އެވެ.