އެއަރ އެމްބިއުލާންސްގެ ޚިދުމަތަށް ހެލިކޮޕްޓަރެއް އިތުރުކުރަނީ

މިއަހަރު ފެށުމަށް ހަމަޖެހިފައިވާ ހެލިކޮޕްޓަރުގެ ޚިދުމަތުގައި އެއަރ އެމްބިއުލާންސްގެ ޚިދުމަތަށް ޚާއްސަކޮށް ހެލިކޮޕްޓަރެއް އޮންނާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިކަން ހާމަކުރެއްވީ ޤައުމީ ދިފާޢީބާރުގެ ވައިގެ ބާރު އިފްތިތާޙުކުރުމާއި، އަންމޭންޑް އޭރިޔަލް ވެހިކަލް ސިފައިންގެ ޚިދުމަތަށް ތަޢާރަފްކުރުމަށް ބޭއްވި ރަސްމިއްޔާތުގައެވެ.

ރައީސުލްޖުމްހޫރިއްޔާގެ ވަޢުދުފުޅާއެއްގޮތަށް އެއަރ އެމްބިއުލާންސްގެ ޚިދުމަތް ފަށާފައިވަނީ މިމަހުގެ ފުރަތަމަ ދުވަހުގައެވެ. މި ޚިދުމަތުގެ ތެރެއަށް މިހާރު އެއަރ އެމްބިއުލާންސްގެ ޚިދުމަތުގައި ސީޕްލޭންވެސް ބޭނުން ކުރަން ފަށާފައިވާއިރު ރައީސުލްޖުމްހޫރިއްޔާ ވަނީ މި ޚިދުމަތުގައި ހެލިކޮޕްޓަރުވެސް ބޭނުން ކުރަން ފެށުމަށް ނިންމަވާފައިވާކަން ހާމަކުރައްވާފައެވެ.

އެއަ އެމްބިއުލާންސް ގޮތުގައި މިހާރު ބޭނުން ކުރަމުން އަންނަނީ ޑޭޝް-8 މަރުކާގެ ބޯޓަކާއި ސަލާމަތީ ގޮތުން ރައްކާތެރި އަދި އިތުބާރު ކުރެވޭގޮތަށް ފަރުމާކޮށްފައިވާ ޑީއެޗްސީ-6 ޓްވިން އޮޓަރ ސީޕްލޭނެކެވެ.

ހެލިކޮޕްޓަރުގެ ޚިދުމަތް ތަޢާރަފްކުރުމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިއަހަރު ނިމުމުގެ ކުރިން ހެލިކޮޕްތާރުގެ ޚިދުމަތް ފަށްޓަވާނެކަމަށްވެ. އަދި އެ ޚިދުމަތުގެ ތެރެއިން އެއް އުޅަނދު އެމްބިއުލާންސްގެ ޚިދުމަތަށް ޚާއްސަކުރައްވާނެކަމަށް ރައީސް ވިދާޅުވިއެވެ. މިއާއެކު އެއަރ އެމްބިއުލާންސްގެ ގޮތުގައި 3 އުޅަނދު ބޭނުންކުރަން ފެށޭނެކަމަށާއި އެކަމުގެ ޤާބިލުކަންވެސް ލިބިގެންދިޔަ ކަން ރައީސް ފާހަގަކުރެއްވިއެވެ.

ރާއްޖޭގައި ފަށަން ނިންމާފައިވާ ހެލިކޮޕްޓަރުގެ ޚިދުމަތުގައި ބޭނުންކުރާނީ ރައްކާތެރިކަމުގެ މިންގަނޑު އެންމެ މަތީ ހެލިކޮޕްޓަރުތައްކަމަށް މަދަނީ އުދުހުންތަކާބެހޭ ވަޒީރު މުޙައްމަދު އަމީން މީގެކުރިން ވަނީ ވިދާޅުވެފައެވެ. ވަޒީރު ވިދާޅުވީ، ރާއްޖޭގައި ހެލިކޮޕްޓަރުގެ ޚިދުމަތްދޭން ސަރުކާރުން ނިންމާފައިވާއިރު، އެކަމުގައި އެންމެ ބޮޑަށް ވިސްނާނީ ރައްޔިތުންގެ ސަލާމަތާއި ރައްކާތެރިކަމަށްކަމަށެވެ. އެގޮތުން މި ޚިދުމަތުގައި ބޭނުންކުރާނީ އެންމެ ރައްކާތެރި "ޓްވިން އިންޖީން" ހެލިކޮޕްޓަރުކަމަށް ވަޒީރު ވިދާޅުވިއެވެ.

1990 އަހަރުތަކުގެ ކުރީކޮޅުން ފެށިގެން 1999 ވަނަ އަހަރާއި ހަމައަށް ރާއްޖޭގައި ދިޔައީ ހެލިކޮޕްޓަރުގެ ޚިދުމަތް ފޯރުކޮށްދެމުންނެވެ. ހަމިންބާޑުގެ ނަމުގައި އޭރު އޮޮޕަރޭޓްކުރަމުންދިޔަ ހެލިކޮޕްޓަރުގެ ޚިދުމަތް ހުއްޓާލީ އޭރު ދިމާވި ހިތާމަވެރި ހާދިސާތަކެއްގެ ސަބަބުންނެެވެ.