ކުޅުދުއްފުށީގައި 2000 ހައުސިން ޔުނިޓްގެ އިމާރާތްކުރުމުގެ މަސައްކަތް މިއަހަރު ފަށާނަން - ރައީސް

މިއަހަރުގެ ތެރޭގައި ކުޅުދުއްފުށި ސިޓީގައި 2000 ހައުސިން ޔުނިޓްގެ ބޯހިޔާވަހިކަމުގެ މަޝްރޫޢެއް ފައްޓަވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އުތުރަށް ކުރައްވާ ދަތުރުފުޅުގެ ތެރެއިން ހދ.ކުޅުދުއްފުށީ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްޙޫރިއްޔާ ޑރ.މުޙައްމަދު މުޢިއްޒު ވިދާޅުވީ ކުޅުދުއްފުށި ސިޓީ ވެގެންދާނީ ސަރުކާރުން ރާއްޖޭގެ 7 ސަރަޙައްދެއްގައި އަރބަން ސެންޓަރު ތަރައްޤީކުރަން ނިންމާފައިވާ ޕްރޮޖެކްޓްގެ 1 ރަށަށްކަމަށެވެ. ބޮޑެތި ރަށްތަކުގައި ޢުމްރާނީ ތަރައްޤީއާއި އިޤްތިޞާދީ ފުރުޞަތުތައް ފަހިކޮށްދީ، އެހެން ރަށްރަށުގެ ރައްޔިތުން އަމިއްލަ އިޚްތިޔާރުގައި އެފަދަ ރަށްތަކަށް ހިޖުރަކުރުމުގެ ފުރުޞަތު ފަހިކޮށްދެއްވާނެކަމަށްވެސް ރައީސުލްޖުމްހުރިއްޔާ ވިދާޅުވިއެވެ.

މިގޮތުން އެންމެ އިސްކަންދޭ މަސައްކަތެއްގެ ގޮތުގައި ކުޅުދުއްފުށީގައި ބޯހިޔާވަހިކަމުގެ ބިޔަ މަޝްރޫޢެއް މިއަހަރުގެ ތެރޭގައި ފައްޓަވާނެކަމަށް ރައީސް ވަނީ ވިދާޅުވެފައެވެ. ރައީސް ވިދާޅުވީ ކުޅުދުއްފުށީގެ ރައްޔިތުންނަށް ވަޢުދުވެވަޑައިގެންފައިވާ ގޮތަށް އެ ރަށުގައި މިއަހަރުގެ ތެރޭގައި 2000 ހައުސިން ޔުނިޓް އެޅުމުގެ މަޝްރޫޢެއް ފައްޓަވާނެކަމަށެވެ.

ރައީސް ވިދާޅުވީ މި މަޝްރޫޢުއާއެކު ކުޅުދުއްފުށީގެ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބޭނެކަމަށެވެ.