ލަންޑަނުގައި ދެ ފުލުހަކަށް ވަޅިން ހަމަލާދީ ޒަޚަމްކޮށްލި މީހަކު ހައްޔަރުކޮށްފި

ލަންޑަންގެ ވެސްޓް އެންޑުގައި، މެޓްރޮޕޮލިޓަން ފުލުހުންގެ ދެ އޮފިސަރަކަށް ވަޅިން ހަމަލާދީ ޒަޚަމްކޮށްލި މައްސަލައެއްގައި މީހަކު ހައްޔަރުކޮށްފިއެވެ. މި ހާދިސާގައި އެކަކަށް ސީރިއަސް އަނިޔާތަކެއް ލިބިފައިވާއިރު، އެ ދެ މީހުންނަށް ވެސް މިހާރު ދަނީ ހޮސްޕިޓަލުގައި ފަރުވާ ދެމުންނެވެ.

މިހާދިސާ ހިނގާފައިވަނީ، ލެސްޓަރ ސްކޮޔަރ ކައިރީގައި ވަޅިއެއް ހިފައިގެން ހުރި މީހަކު އުޅޭކަން ފުލުހުންނަށް ބަޔަކު އެންގުމުން އެސަރަހައްދަށް ދިޔަ ފުލުހުން އޭނާ ހުއްޓޫވަން މަސައްކަތް ކުރުމުންނެވެ.

މީޑިއާތަކުން ރިޕޯޓުކޮށްފައިވާ ގޮތުގައި، އޭގެ ތެރެއިން އެއް ފުލުހެއްގެ ކަރަށް އެމީހާ ވަނީ ވަޅި ހަރާފައި ކަމަށާއި، ދެ ފުލުހުންވެސް އެގަޑީގައި ތިބީ ޔުނީފޯމުގައި ކަމަށެވެ.

މިހަމަލާއާއި ގުޅިގެން އުމުރުން 20 އަހަރުގެ ފިރިހެނެއް ހައްޔަރުކޮޮށްފައިވާއިރު އޭނާއަށްވެސް އެކިވަރުގެ ޒަޚަމްތައް ލިބިފައިވާކަމަށް މީޑިއާ ރިޕޯޓުތައް ބުނެއެވެ. އަދި އޭނާއަށްވެސް ވަނީ ހޮސްޕިޓަލަށް ގެންގޮސް ފަރުވާދީފައި ކަމަށެވެ.