އައްޑޫ ސެންޓްރަލް ޕަވަރ ސްޓޭޝަންގެ މަސައްކަތް އަންނަ އަހަރުގެ ޖުލައި މަހަށް ނިމި ކަރަންޓުގެ މައްސަލައަށް ދާއިމީ ހައްލު ގެނެވޭނެ - ރައީސް

އައްޑޫ ސިޓީގައި ސަރުކާރުން ޤާއިމްކުރާ ސެންޓްރަލް ޕަވަރ ސްޓޭޝަނާއެކު އެ ސިޓީއަށް ދިމާވެފައިވާ ކަރަންޓުގެ މައްސަލައަށް ދާއިމީ ޙައްލެއް ލިބިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ވެރިކަން ކުރާ ޕީއެންސީން ރޭ ބޭއްވި "ދަ ގްރޭޓަރ އައްޑޫ އިވެންޓް" ގައި ވާހަކަފުޅުދައްކަވަމުން ރައީސް ވަނީ އައްޑޫސިޓީއަށް ދިމާވެފައިވާ ކަރަންޓުގެ މަައްސަލަކީ މިއަދު ދިމާވެފައިވާ މައްސަލައެއް ނޫންކަމަށާއި އެތައް ދައުރެއް ނިމިގެންދިޔައިރުވެސް ކަރަންޓުގެ މައްސަލައަށް ހައްލެއް ގެނެސްފައިނުވާކަން ފާހަގަކުރައްވާފައި އެވެ. ނަމަވެސް މި ސަރުކާރުން އައްޑޫސިޓީއަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް ބޮޑު މަޝްރޫޢުއް ކުރިއަށްގެންދަން ނިންމާފައިވާކަން ފާހަގަކުރައްވައި ރައީސް ވިދާލުވީ އައްޑޫ ސިޓީގައި ސަރުކާރުން ޤާއިމްކުރާ ސެންޓްރަލް ޕަވަރ ސްޓޭޝަންގެ މަސައްކަތް އަންނަ އަހަރުގެ ޖުލައި މަހަށް ނިމިގެންދާނެ ކަމަށެވެ.

"26 މެގަވޮޓުގެ ކަރަންޓު ފޯރުކޮށްދޭނެ ނިޒާމު އިރާދަކުރެވިއްޔާ މި އެއްބަސްވުމުގެ ދަށުން ޤާއިމުކުރެވިގެންދާނެ. މިއަންނަ އަހަރުގެ ޖުލައިމަހާ ހަމައަށްދާއިރު އިރާދަކުރެއްވިއްޔާ މުޅިން އެކުގައި މި މަޝްރޫޢު ނިމި، ކުރިއަށްއޮތް 20 އަހަރު ދުވަހަށް އައްޑޫސިޓީގެ ކަރަންޓުގެ މައްސަލަ ހައްލުވެެންދާނެ." ރައީސް ވިދާޅުވިއެވެ.

ކަރަންޓުގެ މައްސަލަ ހައްލުކުރުމަށް ކުރިއަށްގެންދާ މަޝްރޫޢުގެ އިތުރުން އައްޑޫގައި މި ސަރުކާރުން 48 މަޝްރޫޢެއް ކުރިއަށް ގެންދާކަން ފާހަގަކުރައްވައި ރައީސް ވަނީ އޭގެ ތެރެއިން 18 މަޝްރޫއެއް މިހަހަރަށް ބަޖެޓު ކުރެވިފައިވާކަންވެސް ހާމަކުރައްވާފައި އެވެ.

ކަރަންޓުގެ މައްސަލަ ފަދައިން އައްޑޫގެ މަގުތައް ހެދުމުގެ މަސައްކަތަށްވެސް ސަރުކާރުން އިސްކަންދެއްވާކަން ފާހަގަކުރައްވައި ރައީސް ވަނީ އެ ސިޓީގެ މަގުތައް ހެދުމުގެ ދެވަނަ ފިޔަވަހީގެ މަސައްކަތްކުގެ ދަށުން އެކަމަށް ބޭނުންވާނެ ސާމާނާއި މީހުން ހޯދުމުގެ މަސައްކަތް އާރްޑީސީން ކުރައްވަމުންދާކަންވެސް ހާމަކުރައްވާފައި އެވެ.