އިނގިރޭސިވިލާތުގެ ދެމަފިރިއަކު ރާއްޖޭގައި ގާތް ގާތުގައި މަރުވުމުގައި އެހެން މީހެއްގެ ބައިވެރިވުމެއް އޮތް ކަމަކަށް ތުހުމަތު ނުކުރެވޭ!

ރާއްޖޭގައި ޗުއްޓީ ހޭދަކޮށްލުމަށް ޒިޔާރާތްކުރި އިނގިރޭސިވިލާތުގެ ދެމަފިރިއަކު ރާއްޖޭގައި ތިއްބާ ކުއްްލި ގޮތަކަށް ގާތް ގާތުގައި މަރުވުމުގައި އެހެން މީހެއްގެ ބައިވެރިވުމެއް އޮތް ކަމަކަށް ތުހުމަތު ނުކުރެވޭކަމަށް ފުލުހުން ހާމަކޮށްފި އެވެ.

ރާއްޖޭގައި އިނގިރޭސިވިލާތުގެ ދެމަފިރިއަކު ގާތް ގާތުގައި މަރުވި ހާދިސާއެއް ފެންމަތިވީ މިދިޔަ ބުދަ ދުވަހު އިނގިރޭސިވިލާތުގެ މަޝްހޫރު ޑެއިލީ ނޫހުގައި އެކަން ރިޕޯޓުކުރުމާއިގުޅިގެންނެވެ. އެގޮތުން ޑެއިލީ މެއިލުން ރިޕޯޓުކޮށްފައިވާގޮތުގައި ރާއްޖޭގައި ޗުއްޓީ ހޭދަކުރަމުން ދަނިކޮށް މަރުވި ދެމަފިރިންނަކީ މރސ. އެލައިނީ ރިޗްމޮންޑް (70އ) އާއި މރ. މެލްކޮމް ޖޯން ރިޗްމޮންޑް (71އ) އެވެ. އެނޫހުގައި ބުނެފައިވާ ގޮތުގައި އެދެމަފިރިންވެސް ނިޔާސީ ސްކޫބާ ޑައިވިންގ އެކްސިޑެންޓެއްގައި އެވެ.

މިކަމާއި ގުޅޭ މައުލޫމާތު ހާމަކުރަމުން ފުލުހުންގެ މީޑީއާ އޮފިޝަލް ރޭ ވިދާޅުވީ އއ. އަތޮޅުގައި ހިންގާ ރިސޯރޓެއްގައި ޗުއްޓީ ހޭދަ ކުރަމުން ގެންދިޔަ އިނގިރޭސިވިލާތުގެ ފަތުރުވެރިއެއް ކަމަށްވާ މރސ. އެލައިނީ ރިޗްމޮންޑް (70އ)، 2025 ޑިސެމްބަރ 19 ވަނަ ދުވަހުގެ ހެނދުނުގެ ވަގުތެއްގައި އޭނާގެ ފިރިމީހާއާ އެކު އެރިސޯރޓްގެ ފަރުކައިރިއަށް ޑައިވިން އަށް ގޮސް އުޅެނިކޮށް ގެއްލިގެން ހޯދަމުން ދަނިކޮށް އެސަރަހައްދުގެ މޫދުގައި ނިޔާވެފައި އޮއްވާ ފެނިފައިވާ ކަމަށެވެ.

އަދި އޭނާގެ ފިރިމީހާ، މރ. މެލްކޮމް ޖޯން ރިޗްމޮންޑް (71އ)، 2025 ޑިސެމްބަރ 21 ވަނަ ދުވަހު އެނބުރި ގައުމަށް ދިއުމަށްޓަކައި އެއަރޕޯރޓަށް ފުރަން ގޮސް ހުއްޓައި ސިއްހީ ހާލަތު ދަށްވުމާ ގުޅިގެން އެއަރޕޯރޓް ކްލިނިކްގައި ފަރުވާ ދިނުމަށްފަހު އިތުރު ފަރުވާ އަށް އޭ.ޑީ.ކޭ ހޮސްޕިޓަލަށް ގެންދެވި ފަރުވާ ދެމުން ދަނިކޮށް 2025 ޑިސެމްބަރ 24 ވަނަ ދުވަހު މެންދުރުގެ ވަގުތެއްގައި ނިޔާވެފައިވާކަމަށްވެސް މީޑީއާ އޮފިޝަލް ވިދާޅުވިއެވެ.

މީޑިއާ އޮފިޝަލް ވިދާޅުވީ މި ދެ މީހުން ނިޔާވުމުގައި އެހެން މީހެއްގެ ބައިވެރިވުމެއް އޮތްކަމަށް ނުވަތަ ކުށުގެ ތުހުމަތެއް ކުރެވޭ ފަދަ ކަމެއް މިހާތަނަށް ތަހުގީގަށް ފާހަގަކުރެވިފައި ނުވާ ކަމަށެވެ.