ކުށްމަދުކުރުމަށް މައުލޫމާތު ދިނުމުގެ ހަރަކާތެއް ފުލުހުން ކެންދޫގައި ކުރިއަށް ގެންގޮސްފި

ކުށްމަދު އަމާން މުޖުތަމައެއް ރަށްރަށުގައި ގާއިމުކޮށް ރައްޔިތުންނަށް ރައްކާތެރިކަން ކަށަވަރުކޮށްދިނުމާއި ރައްޔިތުން ޒިންމާދާރުކުރުވުމަށް ބ. ކެންދޫގައި ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ.

މި މަހު 11 ވަނަ ދުވަހު ކެންދޫ ޕޮލިހުން ކުރިއަށް ގެންދިޔަ މި ހަރަކާތުގައި ރަށުގެ އެކި ސަރހައްދުތަކުންނާއި ގޭބިސީތަކަށް ޒިޔާރަތްކޮށް ކުށްތަކުން ރައްކާތެރިވެ ތިބުމަށް މައުލޫމާތު ހިއްސާކޮށްފައިވެއެވެ.

އަދި ފުލުހުންނާއި ރައްޔިތުން ގުޅިގެން ކުށްމަދުކޮށް މަގުމަތީގެ ރައްކާތެރިކަން ކަށަވަރުކުރުމަށް ކުރެވިދާނެ މަސައްކަތްތަކާއި އަމިއްލަ މީހާގެ ރައްކާތެރިކަމަށް ކުރެވޭނެ ކަންކަމުގެ މައުލޫމާތު ހިއްސާކޮށްފައިވެއެވެ.

އޭގެ އިތުރުން، މަކަރާއި ހީލަތުން ފައިސާއާއި މުދާ ހޯދާ މައްސަލަތަކުން ސަލާމަތްވެތިބުމަށާއި ނުދަންނަ ނަންބަރުތަކުން އަންނަ ކޯލުތަކަށް ޖަވާބުނުދިނުމަށާއި އޮންލައިންކޮށް ވިޔަފާރިކުރާއިރު ސަމާލުކަންދިނުމަށް ނަސޭހަތްތެރިވެފައިވެއެވެ. އަދި އެއްގަމު އުޅަނދު ދުއްވާއިރު ސަމާލުކަންދިނުމަށާއި ގާނޫނައި ގަވާއިދުތަކާ އެއްގޮތަށް އުޅަނދު ދުއްވުމަށް ނަސޭހަތްތެރިވެފައިވެއެވެ.