މަސްވެރިންގެ މުޒާހަރާގެ ތެރެއިން ހައްޔަރުކުރި މީހުންގެ ތެރޭގައި ކީޕަރު އިމްރާން!

ބޮޑު ކަންނެލީގެ މަސްވެރިން މާލެ ސަރަހައްދުގައި ކުރަމުންދާ މުޒާހަރާގެ ތެރެއިން ހައްޔަރުކުރި މީހުންގެ ތެރޭގައި ރާއްޖޭގައި އުފެދުނު އެންމެ މޮޅު ކީޕަރު، މުހައްމަދު އިމްރާންވެސް ހިމެނޭކަން ކަށަވަރުވެއްޖެ އެވެ.

ބޮޑު ކަންނެލީގެ މަސްވެރިންގެ ޔޫނިއަންއިން އިސްނަގައިގެން މާލެ ސަރަހައްދުން ކަނޑުމަތީގައި ބޮޑު މުޒާހަރާއެއް ފެށީ އިއްޔެ ހެނދުނުއެވެ. އެެގޮތުން މި މުޒާހަރާގައި 50 އަށްވުތެ ގިނަ ދޯނިން އަންނަނީ ބައިވެރިވަމުންނެވެ. ނަމަވެސް ސުލްހަވެރިކޮށް މުޒާހަރާ ހުއްޓުމެއްނެތި ކުރިޔަށްގެންދަނިކޮށް ފުލުހުންގެ ފައުޖެއް މިއަދު ވަނީ ބައެއް ދޯނިތަކަށް އަރާފައި އެވެ.

އެކަމާއި ގުޅިގެން ފުލުހުންގެ މީޑިއާ އޮފިޝަލް މިއަދު ހެނދުނު ވަނީ މަސްވެރިން މިހާރު ކުރަމުންދާ އިހުތިޖާޖުގައި ބިދޭސީން ބައިވެރިވަމުންދާކަން ފާހަގަކުރެވުމާއެކު، އެކަން އެގޮތަށް ނުކުރުމަށް ނަސޭހަތްތެރިވުމަށްފަހު، އެދޯނިތަކުގައި މަސައްކަތްކުރާ ބިދޭސީންނާ ގުޅޭ މައުލޫމާތު ހޯދުމަށްޓަކައި ފުލުހުންނާއި އިމިގްރޭޝަން ގުޅިގެން މަސައްކަތްކުރަމުންދާ ކަން ހާމަކޮށްފައެވެ. އެގޮތުން މިއަދު ފުލުހުން އިހުތިޖާޖުގައި ބިދޭސީން ހަރަކާތްތެރިވާކަމަށް ފާހަގަކުރެވިފައިވާ ދޯނިތަކަށް އަރާފައިވާ ކަމަށް މީޑިއާ އޮފިޝަލް ހާމަކުރެއްވި އެވެ.

ފުލުހުން ދޯނިތަކަށް އެރުމާއިއެކު މުޒާހާރާ ހޫނުވެގެންދިޔައިރު ބަޔަކު ހައްޔަރުކުރާ މަންޒަރު ފެންނަ ވީޑިއޯތަކެއް މިހާރު އަންނަނީ ދައުރުވަމުންނެވެ.

އެކަމާއި ގުޅިގެން މީޑިއާ އޮފިޝަލް ވިދާޅުވީ މަސްވެރިން މިހާރު ކުރަމުންދާ އިހުތިޖާޖާ ގުޅިގެން 2 ދޯނި ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި 3 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

ހައްޔަރުކުރި މީހުންގެ ތެރޭގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ހިމެނޭކަންވެސް މީޑިއާ އޮފިޝަލް ވިދާޅުވިއެވެ. ނަމަވެސް ދެން ހައްޔަރުކުރި ދެމީހުންގެ ވަނަވަރު އާންމުކޮށްފައި ނުވި ނަމަވެސް ހައްޔަރުކުރި މީހުންގެ ތެރޭގައި މިހާރު ފުޓްބޯޅައިގެން ރިޓަޔާކޮށްފައި ހުރި ރާއްޖޭގެ އެންމެ މޮޅު ގޯލްކީޕަރު މުހައްމަދު އިމްރާން ހިމެނޭކަން ގާފު ނޫހަށް ވަނީ ކަށަވަރުވެފައި އެވެ.

އިމްރާންއަކީ މުޒާހަރާ އިންތިޒާމްކުރި ބޮޑުކަންނެލި މަސްވެރިންގެ ޔޫނިއަންގެ ނައިބު ރައީސްއެވެ. އަދި މުޒާހަރާ ލީޑްކުރުމުގައިވެސް އެންމެ އިސް ސަފުގައި ހުންނެވި އެކަކެވެ.