މީޑިއާ މައުރަޒުގައި ޒުވާން ޚަޠީބުން ތަމްރީން ޕްރޮގުރާމުގެ ފަސް ވަނަ ބުރުގައި ބައިވެރިވުމުގެ ފުރުސަތު!

މި ހަފްތާ ބަންދުގައި އިސްލާމީކަންތައްތަކާ ބެހޭ ވުޒާރާގެ އިސްލާމީކް ސްޓޫޑިއޯއާއި ވުޒާރާގެ ސެކްޝަންތައް ގުޅިގެން ކުރިޔަށްގެންދާ މީޑިއާ މައުރަޒު 2025 ގައި ޒުވާން ޚަޠީބުން ތަމްރީން ޕްރޮގުރާމުގެ ފަސް ވަނަ ބުރަށް ރަޖިސްޓްރީވުމުގެ ފުރުސަތު ހުޅުވާލައިފި އެވެ.

އިސްލާމީކަންތައްތަކާ ބެހޭ ވުޒާރާގެ އިސްލާމިކް ސްޓޫޑިއޯއިން އިސްނަގައިގެން ވުޒާރާގެ ސެކްޝަންތަކާއި ގުޅިގެން ކުރިއަށް ގެންދާ މީޑިއާ މައުރަޒު ފެށީ އިއްޔެ ހަވީރު އެވެ.

ދެދުވަހުގެ މުއްދަތަކަށް ކުރިޔަށްގެންދާ މި މައުރަޒު މިއަދު ހެނދުނު 10:00 އިން 18:00 އަށް މީޑިއާ މައުރަޒު ކުރިއަށްދާނެ އެވެ.

އިސްލާމީ ކަންތައްތަކާއި ބެހޭ ވުޒާރާއިން ބުނީ މި މައުރަޒުގައި ޒުވާން ޚަޠީބުން ތަމްރީން ޕްރޮގުރާމުގެ ފަސް ވަނަ ބުރަށް ރަޖިސްޓްރީވުމުގެ ފުރުސަތު ހުޅުވާލާފައިވާ ކަމަށެވެ. މީގެ އިތުރުން މި މައުރަޒުގައި ޒުވާން ޚަޠީބުންނަށް ޚާއްސަ ސްޓޯލެއް ގާއިމްކޮށްފައިވާ އިރު މި ސްޓޯލުގައި ތުއްތު ކުދިންނަށް މިމްބަރުގައި ޚުޠުބާ ކިޔުމާއި ބަންގި ގޮވުމުގެ ފުރުސަތު ލިބިގެންދާނެ އެވެ. މި މައުރަޒުގެ ފުރަތަމަ ދުވަހު ގިނަ އަދަދެއްގެ ތުއްތު ކުދިން މި ސްޓޯލަށް ޒިޔާރަތްކޮށްފައިވެއެވެ.

މި މީޑިއާ މައުރަޒަކީ، ވުޒާރާއިން ކުރިއަށް ގެންދާ މުހިއްމު މަސައްކަތްތަކުގެ މަޢުލޫމާތާއި، މަޝްރޫޢުތަކާއި ގުޅޭ އަދާހަމަތަކާއި، ވަކިވަކި ސެކްޝަންތަކުގެ މަޢުލޫމާތު މީޑިއާތަކާއި އާއްމުންނަށް ވީހާވެސް ގާތުން ގެނެސްދިނުމަށް ބާއްވާ ހާއްސަ މައުރަޒެކެވެ.