ރައީސްގެ ރިޔާސީ ވައުދުފުޅާއި އެއްގޮތަށް ކޭލަކު އެކޯ ޓޫރިޒަމަށް ތަރައްޤީކުރަން އެމްޓީޑީސީއަށް!

ހދ ކޭލަކުނު އެކޯ ޓޫރިޒަމަށް ތަރައްޤީކުރުމަށް އެމްޓީޑީސީއާއި ހަވާލުކޮށްފި އެވެ.

މިކަން ހާމަކުރެއްވީ މިހާރު ހދ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ރައީސް ޑރ މުހައްމަދު މުއިއްޒު ކުޅުދުއްފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި އެވެ.

ރައީސް ވިދާޅުވީ ކުޅުދުއްފުއްޓާއި ކައިރީގައި އޮންނަ އެއަތޮޅު ކޭލަކުނު އެކޯ ޓޫރިޒަމަށް ތަރައްޤީކުރެެއްވުމަށް ސަރުކާރުން މިހާރު އެމްޓީޑީސީއާއި ހަވާލުކޮށްފައިވާ ކަމަށާއި އެކަމުގެ ޕޭޕާވާކްތަކާއި ޑިޒައިނިންގ ގެ މަސައްކަތް މިހާރު އެކުންފުނީން ފުރިހަމަކޮށްފައިވާ ކަމަށެވެ. އަދި ދާދި އަވަހަށް އެމްޓީޑީސީން އެމަސައްކަތުގެ އަމަލީ މަސައްކަތް ފަށާނެކަންވެސް ރައީސް ހާމަކުރެއްވި އެވެ.

ރައީސް ވިދާޅުވީ މި މަޝްރޫއު އެމްޓީޑީސީން ކުރިޔަށްގެންދަނީ އެކުންފުނީގެ އަމިއްލަ ފައިނޭންސިންގ ދަށުން ކަމަށާއި މަޝްރޫއުއަށް ބޭނުންވާ ފައިނޭންސް މިހާރު އެކުންފުނީން ހަމަޖައްސާފައިވާ ކަމަށެވެ.

ރައީސް މިކަން އިއުލާނުކުރެއްވި އިރު ކޭލަކުނު އީކޯ ޓުއަރިޒަމަށް ފައްކާކުރުމަށް ހާއްސަ ދިރާސާއެއް ކުރުމަށް ވަޒީރުންގެ މަޖިލީހުން މިދިޔަ އަހަރު ވަނީ ނިންމާފައި އެވެ. އެދިރާސާގެ ތެރޭގައި ކޭލަކުނު ފަރުތަކާއި މުރަކަތަކަށް ގެއްލުމެއް ނުވާނެހެން އެރަށަށް ޒިޔާރަތްކުރާ ފަރާތްތަކަށް ހާއްސަކޮށްގެން ފްލޯޓީން ރޫމުތަކެއް އެޅެނޭ ގޮތްތަކެއް އޮތްތޯ ބެލުމަށްވެސް ނިންމި އެވެ. ނަމަވެސް އެދިރާސާގެ މައުލޫމާތެއް ސަރުކާރުން ފަހުން ހާމައެއް ނުކުރެއެވެ.

ކޭލަކުނުގައި އީކޯ ޓޫއަރިޒަމްގެ މަޝްރޫއެއް ފެށުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.