މީޑިއާތައް ކޮންޓްރޯލުމުގެ ޝައުގެއް ނެތް، ބިލަށް އިސްލާހު ގެންނަން މެމްބަރުންނަށް އަންގައިފިން - ރައީސް

ރާއްޖޭގެ މީޑިއާތައް ކޮންޓްރޯލް ކުރުމަކީ ކުރައްވަން ބޭނުންފުޅުވާ ކަމެއް ނޫންކަމަށާއި އެފަދަ ކަމެއް ކުރުމުގެ ވިސްނުންފުޅެއްވެސް ނުގެންގުޅުއްވާކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މިހާރު ހދ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިރޭ ނޮލީވަރަމްފަރަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި އެވެ.

އެގޮތުން ރައީސް ވިދާޅުވީ ރާއްޖޭގެ ކަންކަން ފުރިހަމަ ގޮތުގައި ކުރިޔަށް ގެންދިޔުމަށް އެންމެންގެވެސް ޒިންމާއެއް އެބައޮތް ކަމަށާއި އޭގެ ތެރޭގައި ނޫސްވެރިންގެ ޒިންމާތައްވެސް ހިމެނޭ ކަމަށެވެ. އަދި މީޑިއާތައް ކޮންޓްރޯލް ކުރުމުގެ ޝައުގުވެރިކަމެއް ނެތްކަން ފާހަގަކުރައްވައި ރައީސް ވިދާޅުވީ މީޑިއާތައް ކޮންޓްރޯލް ކުރުމަށް އެއްވެސް ކަމެއް ކުރައްވާފައިނުވާނެ ކަމަށާއި މުސްތަގުބަލުގައިވެސް އެފަދަ ކަމެއް ނުކުރައްވާނެ ކަމަށެވެ. ނަމަވެސް ނޫސްވެރިންވެސް މަސައްކަތްކުރައްވަން ވާނި ޒިންމާދާރު ކަމަާއިއެކުގައި ކަމަށް ރައީސް ވިދާޅުވިއެވެ.

އަމިއްލަ މެމްބަރަކު ރައްޔިތުންގެ މަޖިލީހަށް މީޑީއާތައް ރެގިއުލޭޓްކުރުމާއި ބެހޭ ބިލެއް ހުށަހަޅުއްވާފައިވާކަމުގެ މައުލޫމާތު ލިބިފައިވާކަން ފާހަގަކުރައްވައި ރައީސް ވިދާޅުވީ އެމަނިކުފާނުގެ ކޮންޓްރޯލް އެއްވެސް ގޮތަކަށް އޮތުމަށް ނޭދޭ ކަމަށާއި ސަރުކާރު ހިންގާ ޕީއެންސީގެ މެމްބަރުންނަށް މިހާރު އެކަން އަންގަވާފައިވާނެ ކަމަށެވެ.

އެގޮތުން ބިލުގައި އޮތް ގޮތުންނަމަ މީޑިއާތައް ރެގިއުލޭޓްކުރުމަށް އުފައްދާ ކޮމިޝަނުގެ ރައީސަކަށް ބޭފުޅަކު އައްޔަނުކުރުމުގެ ބާރު ރައީސުލްޖުމްހުރިއްޔާއަށް އޮތް އޮތުމާއި ދެކޮޅުކަމަށާއި ބޭނުންފުޅުވަނީ އެބިލް ފާސްވެ ގާނޫނަކަށް ވުމުން އުފައްދާ ކޮމިޝަންގެ ރައީސަކަށް އެކޮމިޝަނުގެ މެމްބަރުންގެ ތެރޭގައި ވޯޓަކުން ރައީސަކު ހޮވުމަށް ކަމަށެވެ.

"އެބިލުގައި ހުށަހަޅާފައި އެބަ އޮވޭ ރައީސުލްޖުމްހުރިއްޔާ އައްޔަނުކުރާ މެމްބަރެކޭ ބިލް ފާސްވެ ގާނުނަކަށް ވަންޏާ އުފެދޭ ކޮމިޝަންގެ ރައީސަކަށް ހުންނާނީ . އެގޮތަށް އެކަމެއް ނުކުރާނަން." ރައީސް ވިދާޅުވިއެވެ.

ރައީސް ވިދާޅުވީ ސަރުކާރުން މީޑިއާއަށް ނުފޫޒު ނުފޯރުވާނެ ކަމަށާއި ރެގިއުލޭޓްކުރުމަށް މިހާރު ހުށަހަޅާފައިވާ ގާނޫނަށް އިސްލާހުތައް ގެނެވިގެންދިޔުމާއިއެކު ނޫސްވެރިންނަށް ފުރިހަމަ މިނިވަންކަން ގާނޫންވެސް ލިބިގެންދާނެ ކަމަށެވެ.