12 އަހަރުގެ ކުއްޖާއަށް ޖިންސީ ގޯނާކުރި މީހާ ޝަރީއަތް ނިމެންދެން ބަންދަށް!

ދެކުނުގެ ރަށެއްގައި 12 އަހަރުގެ ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކުރި މީހާ ޝަރީއަތް ނިމެންދެން ބަންދުކުރުމަށް ކޯޓުން އަމަރުކޮށްފި އެވެ.

ފުލުހުން ބުނީ ސައުތު ޕޮލިސް ( ގއ ، ގދ ، ޏ އަދި ސ ) ގައި ހިމެނޭ ރަށެއްގައި 12 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމަށް ތުހުމަތުކުރެވޭ މައްސަލައެއް މިދިޔަ ހަފްތާގެ ބުދަ ދުވަހުގެ މެންދުރު 12:35 އެހާކަންހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.

އެގޮތުން ފުލުހުންނަށް ރިޕޯޓުކުރީ އިތުބާރު ކުރެވޭ މަގާމެއްގައި ހުރި މީހަކު ކުއްޖާއަށް ޖިންސީ ގޯނާ ކުރި މައްސަލައެއް ކަމަށް ފުލުހުން ވަނީ ބުނެފައި އެވެ.

ފުލުހުން މިއަދު ބުނީ މި މައްސަލައާއި ގުޅިގެން މިއަދު ހެނދުނު 48 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އަދި އެމީހާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް ވަނި އަމަރުކޮށްފައި ކަމަށްވެސް ފުލުހުން ވަނީ ހާމަކޮށްފައި އެވެ.

މި މައްސަލައާއި ގުޅިގެން ހައްޔަރުކުރި މީހާގެ ވަނަވަރެެއް ފުލުހުން ހާމައެއް ނުކުރެއެވެ.

މި މައްސަލަ އެރަށުގެ ޕޮލިސް ސްޓޭޝަނާއި ފެމިލީ އެންޑް ޗައިލްޑް ޕްރޮޓެކްޝަން ގުޅިގެން ދަނީ ތަހުގީގުކުރަމުން ކަމަށް ފުލުހުން ވަނީ ބުނެފައި އެވެ.

މިކަން ސީދާ ހިނގި އަތޮޅަކާއި ރަށެއް ފުލުހުން ހާމަކޮށްފައިނުވަނީ ކުޑަކުދިންނާއި ގުޅޭ މައްސަލަތަކަކީ ސީރިއަސް މައްސަލަ ތަކަކަށް ވާތި ކުއްޖާގެ އައިޑެންޓިޓި ރައްކާތެރި ކުރުމުގެ ގޮތުންނެވެ.