ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ 8 ބިދޭސީޢަކު އަތުލައިގެންފި

ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ 8 ބިދޭސީޢަކު އަތުލައިގެންފި އެވެ.

އިމިގްރޭޝަނުން މިއަދު ބުނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދާކަމަށް ތުހުމަތުކުރެވޭ ބިދޭސީން ހޯދުމަށް، އިމިގްރޭޝަނާއި ފުލުހުން ގުޅިގެން ހިންގި ހާއްސަ އޮޕަރޭޝަންތަކެއްގައި ބިދޭސީ 04 އަންހެނަކާއި 03 ފިރިހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށެވެ.

އެގޮތުން ހިންގި 4 އޮޕަރޭޝަނެއްގައި އަތުލައިގަތީ ބަންގްލަދޭޝްގެ އަންހެނަކާއި 4 ފިރިހެނުންނާއި ރަޝިޔާއަށް ނިސްބަތްވާ 2 އަންހެނުންގެ އިތުރުން އުގަންޑާއަށް ނިސްބަތްވާ އަންހެނެކެވެ.

އިމިގްރޭޝަނުން ބުނީ މި މައްސަލަތައް އިތުރަށް ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން 02 އަންހެނަކު މިހާރު ޑީޕޯޓުކޮށްފައިވާއިރު، ބާކީ 05 ބިދޭސީން ޑިޕޯޓުކުރުމުގެ މަސައްކަތްދަނީ ކުރަމުން ކަމަށެވެ., އެގޮތުން ޑީޕޯޓުކޮށްފައިވަނީ ރަޝިޔާ އަންހެނަކާއި އުގާންޑާ އަންހެނެކެވެ.

މިއީ މިފެށި 2025 ވަނަ އަހަރު ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދާކަމަށް ތުހުމަތުކުރެވޭ ބިދޭސީން ހޯދުމަށް އިމިގްރޭޝަނުން ކުރިޔަށް ގެންދިޔަ ފުރަތަމަ އޮޕަރޭޝަނެވެ.

މިދިޔަ އަހަރުގެ ތެރޭގައިވެސް އިމިގްރޭޝަނުން ވަނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުން ދިޔަ ގިނަ އަދަދެއްގެ ބިދޭސީން އަތުލައިގަނެ ޑީޕޯޓުކޮށްފައެވެ.