ރާއްޖޭގެ ކަނޑުގެ ސަރަހައްދުން އަތުލައިގަތީ ލަންކާގެ ބޯޓެއް!

މިދިޔަ ހަފްތާގައި ރާއްޖޭގެ ކަނޑުގެ ސަރަހައްދުން އަތުލައިގަތް ބޭރުގެ މަސްބޯޓަކީ ލަންކާގެ މަސްބޯޓެއް ކަމަށް ދިވެހި އަސްކަރިއްޔާއިން ބުނެފި އެވެ.

ރާއްޖޭގެ ޚާއްޞަ އިޤްތިޞާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައި، ޤާނޫނާ ޚިލާފަށް ޚާއްޞަ އިޤްތިޞާދީ ސަރަހައްދުގައި ހަރަކާތްތެރިވަމުންދިޔަ ބޭރުގެ މަސް ބޯޓެއް، އެމްއެންޑީއެފް އެއަރ ކޯރ ޑްރޯން ގެ އެހީގައި ލޮކޭޓް ކުރުމަށްފަހު ކޯސްޓްގާޑްގެ ބެލުމުގެ ދަށަށް ގެނެސްފައިވާކަން އެމްއެންޑީއެފުން ހާމަކުރީ މިމަހުގެ 26 ވަނަ ދުވަހު އެވެ.

މި ބޯޓާއި ގުޅޭ އިތުރު ތަފްސީލް ހާމަކުރަމުން އެމްއެންޑީއެެފުން މިއަދު ބުނީ އެބޯޓަކީ ލަންކާއަށް ނިސްބަތްވާ ބޯޓެއް ކަމަށާއި ބޯޓު އަތުލައިގަތްއިރު އޭގައި ތިބީ ލަންކާއަަށް ނިސްބަތްވާ ތިން މީހުން ކަމަށެވެ,

އަދި މި ބޯޓާއި އޭގައި ތިބި ފަޅުވެރިން ތަހުގީގަށް ފުލުހުންނާއި ހަވާލުކޮށްފައިވާކަންވެސް އެމްއެންޑީއެފުން ހާމަކުރެއެވެ.

ރާއްޖޭގެ ކަނޑު ސަރަހައްދަށް ގަވާއިދާ ހިލާފަށް ވަދެ، މަސްވެރިކަން ކުރި ބޯޓްތަކެއް މީގެ ކުރިން ވެސް އެތައް ފަހަރެއްގެ މަތިން އަތުލައިގެންފައިވެ އެވެެ. އަދި އެފަދަ އުޅަނދުތައް ފެނުމަކީ އާންމު ކަމެކެވެ. މިގޮތަށް އަތުލައިގަނެވޭ ގިނަ ބޯޓްތަކަކީ އަވައްޓެރި ގައިމުތަކުގެ ބޯޓްތަކެވެ.